இயன்ற வரையிலும் இனிய தமிழில்...

எழுச்சி வணக்க மாலையும் கரிகாலன் ஈற்றெடுப்பு நூல் வெளியீடும்!

2012-01-14T18:25:00.001+05:30

நண்பர்களே! எனது இரண்டாம் படைப்பாகிய "கரிகாலன் ஈற்றெடுப்பு" நூல் லண்டன் மாநகரில் வெளியீடு காண உள்ளது. அதுபற்றிய செய்தி கீழே:

மூத்த தளபதி கேணல் கிட்டு உட்பட இம்மாததில் வீரகாவியமான மாவீரர்களது நினைவுவணக்க மாலையும், "கரிகாலன் ஈற்றெடுப்பு" நூல் வெளியீடும்.

மூத்த தளபதியும் வரலாற்று நாயகனுமான கேணல் கிட்டு உட்பட இம்மாததில் வீரகாவியமான அனைத்து மாவீரர்களையும் நினைவுகொள்ளும் நினைவுவணக்க மாலை லண்டனில் நடைபெறவுள்ளது.

22.01.2012 ஞாயிர்றுக்கிழமை மாலை 5:30 மணி முதல் மாலை 9:30 மணிவரை Eastham, Barking, London, E6 2RP எனும் முகவரியில் அமைந்துள்ள Eastham TOWN HALL மண்டபத்தில் நடைபெறவுள்ள இந்த நிகழ்வில் "கரிகாலன் ஈற்றெடுப்பு" எனும் தேசியத் தலைவர் தொடர்பான கவிதை நூலும், மேலும் மூன்று ஒலிப் பேழைகளும் வெளியிட்டு வைக்கப்படவுள்ளது.

இந்த நிகழ்வில் பிரித்தானியா வாழ் தமிழ்மக்களை கலந்துகொண்டு மண்னுள்ளும், எம் மனங்களினுள்ளும் வித்தாகி வாழும் மாவீரர்களுக்கு தமது மலர் வணக்கதினை செலுத்துமாறு கேட்டுக்கொள்கின்றோம்.

இம் மாதத்தில் வீரச்சாவைத் தழுவிய மாவீரர்களது உறவினர்கள், மற்றும் உரித்துடையோர் ஐக்கிய இராட்சியத்தில் வசிப்பவர்களாக இருந்தால் 0208 733 8203 எனும் தொலைபேசி இலக்கத்தினூடாகவோ அல்லது info@tnrf.co.uk எனும் மின்னஞ்சலூடாகவோ தொடர்புகொள்ளுமாறு கேட்டுக்கொள்கின்றோம்.

இருவரியில் சொல்வேன் ..(குறள் போல) சில ...!

2011-12-11T16:03:00.002+05:30

வாழ்க உறவுகள் ...

என்னுள் தோன்றுவதை எளியக் குறள்வடிவில் இங்கே உங்களுடன் பகிர்ந்து கொள்கிறேன்.

சின்னச் சின்னத் தலைப்புகளில் வகைப்படுத்த நினைத்திருக்கிறேன் ......

என்றாவது ஒருநாள் நல்லதொரு தொகுப்புக் கிடைக்கும் என்ற நம்பிக்கையோடு

தங்கள் வாழ்த்துகளோடு வளமாய்ப் பெருகும் ’குறள்’ என்ற நம்பிக்கையுடனும் தொடர்கிறேன் ..

கடவுள் :

பிறவாமை வந்தாலும் ஈன்றவனே; உன்னை

மறவாமை வாய்த்தால் இனிது

எப்போ(து) அழைத்தாலும் வந்தென்பின் தப்பாது

நிற்பான் எனையாள் பவன்

...........தொடர வாய்ப்பளியுங்கள்

வெண்பா வ(ப)டிக்கலாம் வா....!

2011-12-11T15:57:00.002+05:30

புதுக்கவிதைகள் போலவே ..... படித்தவுடன் புரியும் வண்ணம் எளிய தமிழில் வெண்பாக்களைத் தரமுடியும் எனக்காட்ட முற்படும் ஒர் 'அணிலின்' சிறு முயற்சி இது ....... பிடித்திருந்தால் தொடர்ந்து வாருங்கள் .... கருத்துக்களைக் கூறி ஆதரவு தாருங்கள்.....

பாரதியின் பிறந்த நாளில் பிறக்கிறது இந்த இழை....

உயரத்தில் பறக்கவைக்கப்போவது நீங்கள் தான்

1. அக்கினிக் குஞ்சு :

வேரோடு மண்மீதில் வீழ்த்தியதாய் எண்ணியே

பாராதி ருக்காதீர் பாரோரே - யாருமெதிர்

பாராத நேரமதில் பாரதிரச் சூழ்வேன்;நான்

பாரதியின் அக்கினிக் குஞ்சு ..

இணைக்குறள் 1330 :[அதிகாரம் 003: நீத்தார் பெருமை] குறளுக்குக் குறளால் விளக்கம்

2009-11-29T10:25:00.002+05:30

21)
ஒழுக்கத்து நீத்தார் பெருமை விழுப்பத்து
வேண்டும் பனுவல் துணிவு
விளக்கக் குறள் :
ஒழுக்கம் சிறந்த துறவியர் நற்பெருமை
சொல்லிஉயர்த் தும்சான்றோர் நூல்

22)
துறந்தார் பெருமை துணைக்கூறி வையத்து
இறந்தாரை எண்ணிக்கொண் டற்று
விளக்கக் குறள் :
அ)
துறந்தோரின் நற்பெருமை கூறல்; உலகில்
இறந்தோரை எண்ணுதல் போல்
ஆ)
துறவியர் நற்பெருமை கூறுதலின் ஞாலத்(து)
இறந்தோரை எண்ணுவ(து) எளிது

23)
இருமை வகைதெரிந்து ஈண்டுஅறம் பூண்டோர்
பெருமை பிறங்கிற்று உலகு
விளக்கக் குறள் :
இருபிறப்பும் தேர்ந்தறிந்து நன்நெறி காப்போர்
பெருமை சிறந்தது(உ)ல கில்

24)
உரனென்னும் தோட்டியான் ஆரைந்தும் காப்பான்
வரனென்னும் வைப்பிற்கோர் வித்து
விளக்கக் குறள் :
அறிவென்னும் அங்குசத்தால் ஐம்புலனும் காப்போர்
துறவென்னும் ஞாலத்து வித்து

25)
ஐந்தவித்தான் ஆற்றல் அகல்விசும்பு ளார்க்கோமான்
இந்திரனே சாலுங் கரி
விளக்கக் குறள் :
ஐம்பொறி ஆசை அழித்தவன் ஆற்றலுக்கு
இந்திரனே போதியச் சான்று

26)
செயற்கரிய செய்வார் பெரியார் சிறியர்
செயற்கரிய செய்கலா தார்
விளக்கக் குறள் :
அ)
பெரியோர் பெரும்செயல் செய்வார்; சிறியோர்
பெருமைச் செயல்செய்யா தோர்
ஆ)
அருஞ்செயல் செய்வோரே சான்றோர் ; சிறியோர்
எனப்படுவோர் ஒன்றும்செய் யார்

27)
சுவைஒளி ஊறுஓசை நாற்றமென்று ஐந்தின்
வகைதெரிவான் கட்டே உலகு
விளக்கக் குறள் :
அ)
புலம்ஐந்தும் ஆள்பவனைத் தேடிவந்து சேரும்
உலகினை ஆளும் பலம்
ஆ)
ஐம்புலன் ஆட்க்கொள்ளும் ஆற்றல் உடையோரை
என்றும் போற்றும் உலகு

28)
நிறைமொழி மாந்தர் பெருமை நிலத்து
மறைமொழி காட்டி விடும்
விளக்கக் குறள் :
பற்றற்ற சான்றோர் பெருமை அவர்தம்
அறவழிச் சொல்உணர்த் தும்

29)
குணமென்னும் குன்றேறி நின்றார் வெகுளி
கணமேயும் காத்தல் அரிது
விளக்கக் குறள் :
அ)
நற்பண்புச் சான்றோர் பெருங்கோபம் கொண்டால்
சிறுகணம் கூடநிலைக் காது
ஆ)
நற்பண்புச் சான்றோரின் கோபம் எதிர்த்து
ஒருகணம் நிற்கஇய லாது
[ காத்தல் = இரண்டு பொருளும் தருவதாய் உணர்கிறேன்]

30)
அந்தணர் என்போர் அறவோர்மற் றெவ்வுயிர்க்கும்
செந்தண்மை பூண்டொழுக லான்
விளக்கக் குறள் :
அ)
அனைத்துயிர் அன்புகொண்(டு) அருள்புரிவார் அந்தணர்
என்ற அறஞ்செய் பவர்
ஆ)
அனைத்துயிர் அன்பால் அருளால் அறமாய்
அணைப்பார் அந்தணர்என் போர்

இணைக்குறள் 1330 :[அதிகாரம் 002: வான் சிறப்பு] குறளும், குறளால் விளக்கமும்

2009-11-21T22:43:00.002+05:30

அதிகாரம் 002 : வான் சிறப்பு
11)
வான்நின்று உலகம் வழங்கி வருதலால்
தான்அமிழ்தம் என்றுணரற் பாற்று

விளக்கக் குறள் :
அ)
மண்ணுயிரின் வாழ்வுயர வானிருந்து மண்புகும்
நல்அமுதம் என்றும் மழை

ஆ)
மண்ணுயிரின் வாழ்வுயர வானிருந்து காலமெல்லாம்
மண்புகும்அ மிழ்தாம் மழை

12)
துப்பார்க்குத் துப்பாய துப்பாக்கித் துப்பார்க்குத்
துப்பாய தூஉம் மழை

விளக்கக் குறள் :
உணவாக்க உற்ற துணையாகும்; உலகுக்(கு)
உணவாய் இருக்கும் மழை

13)
விண்நின்று பொய்ப்பின் விரிநீர் வியன்உலகத்து
உள்நின்று உடற்றும் பசி

விளக்கக் குறள் :
பருவமழை பொய்த்தால் கடும்பசியில் உய்யும்
பெரும்கடல் சூழ்இவ் உலகு

14)
ஏரின் உழாஅர் உழவர் புயலென்னும்
வாரி வளங்குன்றிக் கால்

விளக்கக் குறள் :
அ)
புயல்போல் வழங்கும் மழைவளம் குன்றின்
வயலில் உழவும்குன் றும்

ஆ)
வாரி வழங்காது மாரி குறைந்துவிடின்
ஏரின்றி வாடும் நிலம்

15)
கெடுப்பதூஉம் கெட்டார்க்குச் சார்வாய்மற்று ஆங்கே
எடுப்பதூஉம் எல்லாம் மழை

விளக்கக் குறள் :
பொய்த்துக் கெடுத்துப்பின் பெய்து கொடுக்கவும்
செய்யவல்ல(து) இங்கு மழை

16)
விசும்பின் துளிவீழின் அல்லாமல்மற் றாங்கே
பசும்புல் தலைகாண் பரிது

விளக்கக் குறள் :
மழைத்துளி வீழாது போய்விடின் மண்ணிலொரு
புல்நுனியும் காண்ப(து) அரிது

17)
நெடுங்கடலும் தன்நீர்மை குன்றும் தடிந்தெழிலி
தான்நல்கா தாகி விடின்

விளக்கக் குறள் :
பெரும்கடலும் வற்றும்;நீர் மேகமாய் மாறி
வரும்மாரி நின்றுபோ னால்

18)
சிறப்பொடு பூசனை செல்லாது வானம்
வறக்குமேல் வானோர்க்கும் ஈண்டு

விளக்கக் குறள் :
அ)
வான்மழை பொய்த்தால் உலகில் தடைபடும்
வானவரை வாழ்த்தும் விழா

ஆ)
வானவர்க்குப் பூசை நடக்காது போய்விடும்
வான்மழை பொய்த்தபின் இங்கு

19)
தானம் தவம்இரண்டும் தங்கா வியன்உலகம்
வானம் வழங்கா தெனின்

விளக்கக் குறள் :
செய்தானம் நற்தவம் நின்றுவிடும் வான்மழை
பெய்யா உலகம் தனில்

20)
நீர்இன்று அமையாது உலகெனின் யார்யார்க்கு
வான்இன்று அமையாது ஒழுக்கு

விளக்கக் குறள் :
நீர்இன்றி வாழ்க்கை நகரா(து) உலகினில்;
யார்க்கும் அதுபோல் மழை

இணைக்குறள் 1330 : (திருக்குறளும் விளக்கக் குறளும்) :

2009-11-19T22:53:00.008+05:30

அன்பின் உள்ளங்களுக்கு .,

திருக்குறளுக்கு விளக்கவுரையை குறளிலேயே அமைக்கலாம் என்ற முயற்சி இது .
. நான் செய்யக்கூடியது , செய்யக் கூடாதது பற்றிய தங்களின் அறிவரைக்காக வேண்டி நிற்கிறேன்

இதனப் பற்றிய தங்களின் மேலான கருத்துக்களை அறியக் காத்திருக்கிறேன்.

அதிகாரம் 01 : கடவுள் வாழ்த்து :
======================================

01)
அகர முதல எழுத்தெல்லாம் ஆதி
பகவன் முதற்றே உலகு

விளக்கக் குறள் :
அ)
எழுத்துக்(கு) அகரம் ; அதுபோன்றே இப்பூ
வுலகுக்கு என்றும் இறை

ஆ)
எழுத்துக்கு மூலம் அகரம்; இறைவன்
உலகத்தில் வாழும் உயிர்க்கு

இ)
அகரமே மூலம் மொழிக்கு; இறைவன்
பகலவன்கீழ் வாழும் உயிர்க்கு

ஈ)
அகரம் மொழிக்கெல்லாம் மூலம்; பகலவன்கீழ்
வாழும் உயிர்க்கு அவன்

02)
கற்றதனால் ஆய பயனென்கொல் வாலறிவன்
நற்றாள் தொழாஅர் எனின்

விளக்கக் குறள் :
கற்றறிந்தோர்; ஆண்டவன்தாள் ஏற்காதோர்; எல்லாம்
அறிந்தும் அறியா தவர்

03)
மலர்மிசை ஏகியான் மாணடி சேர்ந்தார்
நிலமிசை நீடுவா வார்

விளக்கக் குறள் :
மலர்மனம் வாழும்இறைத் தாளடி சேர்ந்தோர்
உலகில் நிலைத்துவாழ் வார்

04)
வேண்டுதல் வேண்டாமை இலானடி சேர்ந்தார்க்கு
யாண்டும் இடும்பை இல

விளக்கக் குறள் :
பற்றற்ற ஆண்டவன் நற்பாதம் சேர்ந்தார்க்கு
முற்றும் இடையூறு இல்

05)
இருள்சேர் இருவினையும் சேரா இறைவன்
பொருள்சேர் புகழ்புரிந்தார் மாட்டு

விளக்கக் குறள் :
அ)
பொருளாசை காரிருள் அண்டாது நற்கடவுள்
பொருள்தம்முள் ஏற்றார் இடம்

ஆ)
அறியாமை ஆசையும் அண்டாது; ஆண்டவனின்
அர்த்தம் புரிந்தோர் வசம்

06)
பொறிவாயில் ஐந்தவித்தான் பொய்தீர் ஒழுக்க
நெறிநின்றார் நீடுவாழ் வார்

விளக்கக் குறள் :
ஐம்புலம் ஆட்கொண்ட ஆண்டவன் பாதைசெல்வோர்
என்றும் நிலைத்துவாழ் வார்

07)
தனக்குவமை இல்லாதான் தாள்சேர்ந்தார்க் கல்லால்
மனக்கவலை மாற்றல் அரிது

விளக்கக் குறள் :
அ)
ஒப்பில்லா ஆண்டவன் தாள்சேர்ந்தார் அல்லாதோர்
துக்கம் களைதல் அரிது

ஆ)
தனக்கு இணையில்லா அவன்தாள்ப் பணியாதோர்
துன்பம் தவிர்த்தல் அரிது

08)
அறவழி அந்தணன் தாள்சேர்ந்தார்க் கல்லால்
பிறஆழி நீத்தல் அரிது

விளக்கக் குறள் :
அறக்கடவுள் தாள்சேரா(து); இப்பிறவி ஆழ்கடல்
சற்றும் கடத்தல் அரிது

09)
கோளில் பொறியில் குணமிலவே எண்குணத்தான்
தாளை வணங்காத் தலை

விளக்கக் குறள் :
இருந்தும் இயங்காப் புலமாம்; அவன்தாள்
விரும்பி வணங்காத் தலை

10)
பிறவிப் பெருங்கடல் நீந்துவர் நீந்தார்
இறைவன் அடிசேரா தார்

விளக்கக் குறள் :
பிறவிப் பெருங்கடல் நீந்திக் கடக்கார்
இறைவன் அடித்தொடரா தார்

திருக்குறளும் , என்குரலும்...

2009-11-13T19:31:00.002+05:30

அதிகாரம் :3 நீத்தார் பெருமை
(ஆசிடைவெண்பாவாய் என்குறளும் , திருக்குறளும் )

21)
ஒழுக்கம் சிறந்த துறவியர் நற்பெருமை
சொல்லிஉயர்த் தும்சான்றோர் நூல்கள் - உலகில்
ஒழுக்கத்து நீத்தார் பெருமை விழுப்பத்து
வேண்டும் பனுவல் துணிவு

[முதல்குறள் ஈற்று = நூல் ; ஆசு = கள் ]

23)
இருபிறப்பும் தேர்ந்தறிந்து நன்நெறி காப்போர்
பெருமை சிறந்தது(உ)ல கில்காண் - பிறப்பில்
இருமை வகைதெரிந்து ஈண்டுஅறம் பூண்டோர்
பெருமை பிறங்கிற்று உலகு

[முதல்குறள் ஈற்று = கில் ; ஆசு = காண்]

24)
அறிவென்னும் அங்குசத்தால் ஐம்புலனும் காப்போர்
துறவென்னும் பூமிக்கு வித்து - சிறந்த
உரனென்னும் தோட்டியான் ஆரைந்தும் காப்பான்
வரனென்னும் வைப்பிற்கோர் வித்து

[முதல்குறள் ஈற்று = வித்து ; ஆசு = - ]

25)
ஐம்பொறி ஆசை அழித்தவன் ஆற்றலுக்கு
இந்திரனே போதியச் சான்று - மனமென்னும்
ஐந்தவித்தான் ஆற்றல் அகல்விசும்பு ளார்க்கோமான்
இந்திரனே சாலுங் கரி

[முதல்குறள் ஈற்று = சான்று ; ஆசு = - ]

28)
பற்றற்ற சான்றோர் பெருமை அவர்தம்
அறவழிச் சொல்உணர்த் தும்பார் - சிறந்த
நிறைமொழி மாந்தர் பெருமை நிலத்து
மறைமொழி காட்டி விடும்

[முதல்குறள் ஈற்று = தும் ; ஆசு = பார்]

காத்திருக்கிறாள் தமிழச்சி...!

2009-11-13T12:01:00.002+05:30

அன்பின் உள்ளங்களே ,
கிராமியப்பாடல் ஒன்று ; பயணத்தின் போது கேட்க நேர்ந்தது .மூலம் தெரியவில்லை .,ஆனால் அதன் ஆழம் என்னை மிகவும் பாதித்தது . சில நிகழ்விடங்களை உள்வாங்கி அதை வெண்பாவில் பதித்திருக்கிறேன் .

காத்திருக்கிறேன் நானும் ...!

ஊரடங்கும் சாமத்தில் தூங்காமல் நானிருக்க
ஊரெல்லை யில்என(து) உள்ளம் தவமிருக்கு
ஆழத்துள் மூழ்கிவிட்ட அம்மிக் குழவியாய்
ஆழ்மனதுள் உன்நினைப் பு

கருவேல முள்ளொடிச்சுக் கள்ளிச் செடியில்
ஒருசேர நம்பேர ஒண்ணா எழுதிவச்சு
ஊரவிட்டுப் போகையில காத்திருன்னு சொன்னஉன்
வார்த்தையிலென் மூச்சிருக் கு

ஊர்க்கோடி ஓரத்தில் ஒத்தையில் நானிருக்கேன்
ஊருணிப் பாறையின் மத்தியில் தானிருக்கேன்
ஊரெல்லாம் சாடைக்கு ஓரணியில் சேர்ந்திருக்கு
யாரெனைச் சொல்வா ருனக்கு

சொத்தைப்பல் லுன்னுசொல்லி சும்மாப் புடுங்கியே
செத்தைக்குள் வீசுனியே சிங்கப்பல் ஒன்றையே
சொத்தைப்போல் பொத்தியே சட்டையில் சுத்தியே
மெத்தைக்குள் வச்சிருக் கேன்

ஊரே தடுத்தாலும் உள்ளேநீ தானிருப்பாய்
யாரும் பிரிச்சாலும் என்னுள்நீ வாழ்ந்திருப்பாய்
உன்மூச்சுக் காற்றிலென் மூச்சுவாங் கும்வரைக்
கன்னியிருப் பாளிங்கேக் காத்து

என்றும் மறையாத என்மனச் சூரியனே
இன்றும் குறையாத என்குணச் சந்திரனே
காப்பாய் வடக்கைக் கரையாய் ; உனக்காகக்
காத்திருப்பேன் நான்கரையா மல்

கலங்காதே காத்திருக்குக் காலம் நமக்கு
துலங்காதே நீயில்லா(து) ஒன்றும் எனக்கிங்கு
காத்திருப்பாய் எல்லையை சாமியாய் நீயங்கு
காத்திருப்பேன் உன்னைநான் இங்கு

திருக்குறளும் , என்குரலும்...!

2009-11-10T22:18:00.003+05:30

அதிகாரம் 2 : வான் சிறப்பு
12)
உணவாக்க உற்ற துணையாகும்; உலகுக்(கு)
உணவாய் இருக்கும் மழைஇங்கு - மண்ணிலே
துப்பார்க்குத் துப்பாய துப்பாக்கித் துப்பார்க்குத்
துப்பாய தூஉம் மழை

[முதல்குறள் ஈற்று = மழை ; ஆச்சு = இங்கு]

13)
பருவமழை பொய்த்தால் கடும்பசியில் உய்யும்
பெரும்கடல் சூழ்இவ் உலகு - விரிநீல
விண்நின்று பொய்ப்பின் விரிநீர் வியன்உலகத்து
உள்நின்று உடற்றும் பசி

(முதல்குறள் ஈற்று = உலகு ; ஆசு = - ]

15)
பொய்த்துக் கெடுத்துப்பின் பெய்து கொடுக்கவும்
செய்யவல்ல(து) இங்கு மழைமட்டும் - பெய்யாக்
கெடுப்பதூஉம் கெட்டார்க்குச் சார்வாய்மற்று ஆங்கே
எடுப்பதூஉம் எல்லாம் மழை

[முதல்குறள் ஈற்று = மழை ; ஆசு = மட்டும் ]

16)
மழைத்துளி வீழாது போய்விடின் மண்ணிலொரு
புல்நுனியும் காண்ப(து) அரிதாகும் - விண்ணின்
விசும்பின் துளிவீழின் அல்லாமல்மற் றாங்கே
பசும்புல் தலைகாண் பரிது

[முதல்குறள் ஈற்று = அரிது ; ஆசு = ஆகும் ]

17)
பெரும்கடலும் வற்றும்;நீர் மேகமாய் மாறி
வரும்மாரி நின்றுபோ னால்தான் - விரிந்த
நெடுங்கடலும் தன்நீர்மை குன்றும் தடிந்தெழிலி
தான்நல்கா தாகி விடின்

[முதல்குறள் ஈற்று = னால் ; ஆசு = தான் ]

திருக்குறளும் , என்குரலும்...!

2009-11-09T21:02:00.006+05:30

அன்பின் உள்ளங்களே .,

திருக்குறளுக்கான எளிய விளக்கமாக (அ ) ஒத்தக் கருத்துள்ள எனது முதல் குறளையும், தொடர்ந்து அதற்கான திருக்குறளையும் ‘ஆசிடை நேரிசை வெண்பா’ வாக அமைத்துள்ளேன் .

தங்களின் மேலான அறிவுரைகளால் இலக்கினை நோக்கிச் செலுத்துங்கள் ., இயன்றதைச் செய்வேன்.

நன்றி !

[ஆசிடை நேரிசை வெண்பா :

இருகுறள்களை ஒன்று சேர்த்து, ஒரு நேரிசை வெண்பாவாக்க முயலும்போது,
முதல் குறள் 'நாள்' அல்லது 'மலர்' என்ற ஓரசைச் சீரில் முடிந்தால், அந்த ஓரசையுடன்
ஒன்றோ, இரண்டோ அசைகள் சேர்த்தால் தான், தளை தட்டாத நேரசை வெண்பா
(தனிச்சொல்லுடன்) உருவாகும். (ஏன்?) 'காசு', 'பிறப்பு' என்று
முடிந்தாலும் , பொருத்தமான எதுகையுடைய
தனிச்சொல்லைத் தேர்ந்தெடுக்க ஒன்றோ, இரண்டோ அசைகளைச் சேர்க்க நேரிடும்.
இவற்றை 'ஆசிடை நேரசை வெண்பா'க்கள் என்பர். 'ஆசு' என்பது உலோகத் துண்டுகளை
இணைப்பதற்குப் பயன்படுத்தும் பற்று.

நன்றி ; யாப்புலகம் ]

அதிகாரம் 01 : கடவுள் வாழ்த்து :
01)
எழுத்துக்(கு) அகரம் ; அதுபோன்றே இப்பூ
வுலகுக்கு என்றும்ஆண் டவன்தான் - உலவும்
அகர முதல எழுத்தெல்லாம் ஆதி
பகவன் முதற்றே உலகு -----------------------(1)

[முதல்குறள் ஈற்று = டவன் ; ஆசு = தான் ]

02)
கற்றறிந்தோர்; ஆண்டவன்தாள் ஏற்காதோர்; எல்லாம்
அறிந்தும் அறியா தவராவார் - முற்றிலும்
கற்றதனால் ஆய பயனென்கொல் வாலறிவன்
நற்றாள் தொழாஅர் எனின்----------------------(2)

[முதல்குறள் ஈற்று = தவர் ; ஆசு = ஆவார் ]

அதிகாரம் 02 : வான் சிறப்பு :..
11)
மண்ணுயிரின் வாழ்வுயர வானிலிருந்(து) காலமெல்லாம்
மண்புகும்அ மிழ்தாம் மழையது - என்றும்போல்
வான்நின்று உலகம் வழங்கி வருதலால்
தான்அமிழ்தம் என்றுணரற் பாற்று ---------------(3)

[ முதல்குறள் ஈற்று = மழை; ஆசு = அது ]

வெண்பா: வேட்கை.

2008-11-10T16:47:00.004+05:30

வேட்கை

எனக்குத் தெரிவதேயில்லை
நடுநடுங்கும்
ஒரு எளிய சுடரை
எப்படிக் காப்பதென்று

பற்றிக்கொள்
பற்றிக்கொள் எனப்
படபடக்கின்றன
திரைச் சீலைகள்

என்பது நவீனகவிஞர் மனுஷ்யபுத்திரன் எழுதிய ஒரு கவிதை. இதையே நான் வெண்பாவில் மாற்றிப்பார்த்தேன்:

நடுநடுங்கும் இச்சுடரை நான்காத் திடத்தான்
விடையொன்று வேண்டுதே உள்ளம் - இடையில்
படபடக்கும் அச்சீலை பேசுவதைக் கேட்பின்
தடையற பற்றுவதாம் தீர்வு.

"ஒரு கவிதையை வெண்பாவாக மாற்றியது இன்னும் அதை அதிக ரசனையுடன்மனதில் இருத்திக் கொள்ளச் செய்தது.." என்றார் அக்குழுமத்தில் ஒரு நண்பர்.

இன்றைக்கு தற்செயலாக கண்ணுற்றபோது பிறிதொரு குழுமத்தில் கவிஞர்
இராஜ.தியாகராஜன் இதில் சில திருத்தங்களைச் செய்துள்ளார். அவருக்கு என் நன்றி.

ஐயா இராஜ.தியாகராஜன் செய்துள்ள திருத்தமும் விளக்கமும்:

இராஜ. தியாகராஜனின் வணக்கம்.
நீண்ட நாட்களுக்குப்பின் இணையத்திற்கு
வருகிறேன். பணிச்சுமை. உங்கள்வினாவிற்கு பதிலோ அன்றி நீங்கள் எந்த
பாடலையொற்றி வெண்பா புனைந்தீர்களோ,நானறியேன் ஆயினும் சிறிது மாற்றங்களுடன் உங்கள் வெண்பா இதோ:
நடுநடுங்கு மச்சுடரை நான்காத் திடவே
விடையொன்றை யுள்ளமது வேண்டும்! - இடையில்
படபடக்குஞ் சீலை பகர்வதையேக் கேட்டுத்
தடையறப் பற்றுவதே சால்பு!

------------குறிப்பு:
நடுநடு = நான்கா
விடை = வேண்டும்
படபட = பகர்
தடை = சால்பு
இவை பொழிப்பு மோனை விகற்பங்கள்
உங்கள் பாடலில்,விடை = வேண்டுதே
மேற்கதுவாய் மோனை விகற்பம்.
படபட = பேசுவதை மோனையாகாது
தடையற = தீர்வு மோனையாகாது.

(இதேபோல எளிய அழகிய புது/நவீனக் கவிதைகளை மரபில் எழுதிப் பார்க்கலாமே என்ற எண்ணத்திலேயே இவற்றை இங்குக் குறிப்பிடுகிறேன். நன்றி)
நண்பர்கள் பின்னூட்டங்களில் எழுதுங்களேன்.

ஈற்றடி இந்தா எழுது!

2008-09-09T16:01:00.003+05:30

மன்னிக்க வேண்டும் நண்பர்களே! ஓரிரு கிழமைகளாக (வாரங்களாக) எனக்கு அம்மை போட்டிருந்ததால் பதிவைத் தொடர முடியவில்லை. இதோ இக்கிழமைக்கான ஈற்றடியை வழங்குகிறேன்.

இக்கிழமைக்கான ஈற்றடி:- "ஈற்றடி இந்தா எழுது!"

குறிப்பு:-இடுத்தடுத்த கிழமைகளில் (வாரங்களில்) ஈற்றடி வழங்க ஜீவ்ஸ் இலவசக்கொத்தனார் வாஞ்சிநாதன் செல்விசங்கர் இப்னுஹம்துன் ஆகியோரை அன்புடன் அழைக்கிறேன்.

அகரம்.அமுதா

தமிழில் பாடுவோம்

2008-08-12T21:54:00.002+05:30

அறிவு :
மல்லல் உலகம் மகிழ்வாய் மலர்ந்திட
அல்லல் களைந்தே அருந்துயர் போக்கிடு !
கல்லால் நிலையும் காவியம் போற்றிட
சொல்லால் உரைப்பாய் கவி.

அமைதி :
கண்களில் தோன்றும்! கனிவாய் மகிழ்ந்திடும்
பண்களில் பாடிடும்! பாவை அருகினில்
தண்ணெழில் கூட்டிடும் தாரக மந்திரம்
உன்னிதழ் ஊறும் மொழி !

அழிவு :
கூடிய மக்கள் குருவியாய் வீழ்ந்திட
நாடிய உள்ளம் வெடித்தே சிதற
நிலைகலங்கும் நீள்கதையாய் மாறும் நிகழ்வே
குலைநடுக்கும் குண்டுகள் ஏன் ?

விலைபேசும் மக்கள் இனமே ! விடிவதற்குள்
அலைவீசும் ஆழியாய் குண்டுகள் மாற
வலைவீழும் மீனினமாய் மாறும் உடல்கள்
நிலைமீள பக்கம்வா பார்த்து !

செல்வி ஷங்கர்

அன்பு

2008-08-12T21:50:00.002+05:30

அருள்தனைப் பாடி அகிலம் சிறக்க
இருப்பதை ஈந்தே இயலாமை போக்கி
தருவதைப் பார்த்தே மகிழ்ந்திடு ! நாளும்
பொருள்தனை போற்றி இரு.

செல்வி ஷங்கர்

பண்பாய் தமிழில் படி

2008-08-12T21:47:00.002+05:30

அன்பாய் அழகாய் அருவியாய் ஆர்த்திடும்
என்பால் எழுந்த எழிலே ! உன்பால்
நன்றாய் நவின்ற நனிமொழியாம் வான்மறையை
பண்பாய் தமிழில் படி

செல்வி ஷங்கர்

காட்சிக்குக் கவிதை!

2008-08-11T10:07:00.004+05:30

இன்றைய இடுகையில் வெண்பாவிற்கான ஈற்றடி வழங்கப் போவதில்லை. மாறாக காட்சிக்குக் கவிதை எழுதப்போகிறோம்.

நீங்கள் அனைவரும் சீனா பெய்ஜிங்கில் நடந்துவரும் ஒலிம்பிக் பற்றி அறிந்திருப்பீர்கள். பற்பலர் ஒலிம்பிக்கின் தொடக்க விழாவை இணையத்தின் மூலமாகவும் தொலைக்காட்சிகளின் மூலமாகவும் பார்த்திருக்க வாய்ப்புள்ளது.

இங்கு பெய்ஜிங் ஒலிம்பிக் விளையாட்டரங்கின் நிழற்படத்தைப் பதிவுசெய்கிறேன். அப்படத்திற்கு ஏற்றார்போல் வெண்பா எழுதுமாறு வேண்டுகோள் விடுக்கிறேன்.

அகரம்.அமுதா

பண்பாய் தமிழில் படி!

2008-08-04T17:43:00.002+05:30

முதலிரு சீரிணை முதலிருந் திரண்டிடை
இடையீடு பொழிப்பொரூஉ ஈறிலி கூழை
முதலீ றழலில மேல்கீழ்க் கெதுவாய்
முழுவது முற்றே கடையிரு சீரிணை
கடைமூன்று கூழை இடையிரண் டிடைபுணர்
இரண்டும் நான்கும் பின்னெனப் படுமே!

என தொல்காப்பியர் மோனைகளை வகை பிரித்துள்ளார் எனினும் தற்காலத்தில் பொழிப்பு மோனையைப் பயன்படுத்தி எழுதுவதையே பெருமையாக் கருதுகிறார்கள்.

முடியுமென்றால் அவ்வப்பொழுது ஏதேனும் ஓரடியில் முற்று மோனையும் செய்கிறார்கள். ஓரடியில் உள்ள நான்கு சீர்களிலும் முற்றுமோனை அமைப்பது என்பது அவ்வளவு எளிதன்று. கீழ்வரும் நாலடியார் பாடலைப்பாருங்கள் இரண்டாமடியின் அனைத்துச் சீர்களிலும் மோனை அமைந்திருப்பதை!

விருப்பில்லார் இல்லத்து வேறிருந் துண்ணும்
வெருக்குக்கண் வெங்கருணை வேம்பாம் -- விருப்புடைத்
தன்போல்வர் இல்லுள் தயங்குநீர்த் தண்புற்கை
என்போ டியைந்த அமிழ்து.

அவ்வப்போது கூழைமோனை அமைத்தும் பாடுவது உண்டு.

இவ்வளவில் செல்லுங்கொல் இவ்வளவில் காணுங்கொல்
இவ்வளவில் காதில் இயம்புங்கொல் -- இவ்வளவில்
மீளுங்கொல் என்றுரையா விம்மினான் மும்மதம்நின்று
ஆளுங்கொல் யானை அரசு.

இந்நளவெண்பாவை உற்று நோக்குக. இரண்டாமடியின் 1,3,4 ஆகிய சீர்களில் மோனை பொருந்தி வந்தமை.

இக்கிழமைக்கான ஈற்றடிக்கு ஆற்றல் படைத்தவர்கள் ஏதேனும் ஓர் வரியில் முற்று மோனையையோ அல்லது ஓரடியின் மூன்றுசீர்களிலேயோ மோனை அமைத்து எழுதுமாறு வேண்டுகிறேன்.

இக்கிழமைக்கான ஈற்றடி:- பண்பாய் தமிழில் படி!

அகரம்.அமுதா

அறிமுகம்!

2008-07-28T09:23:00.003+05:30

அன்பன்என் பேரமுதா! ஆர்ப்பதெல்லாம் சீர்மரபே!
தென்னவன்நான் செந்தமிழின் சீரெடுத்தே -மன்னும்
குணத்தமிழர் மாமரபு குன்றா துமக்கு
வணக்கங்கள் வைக்கின்றேன் வந்து!

என்னைப்பற்றி மேலும் அறிய இங்கு செல்லவும். என் வெண்பா எழுதலாம் வாங்க வலைப்பக்கத்தைப் பார்வையிட்ட நண்பர் ஜீவா அவர்கள், "அப்பணியை இயன்றவரை இனிய தமிழிலும் எங்களோடு இணைந்து செய்யமுடியுமா?" என வினவினார். "இயன்றவரை இனியதமிழ் இடையில் செயல்படாமல் நின்றுபோனதால்தான் நான் என்வலையில் அப்பணியைச் செய்யத்துவங்கினேன். மீண்டும் இனியதமிழ் செயல்படுமானால் மகிழ்ச்சியே! இனியதமிழ் இயங்க என்னாலான பங்களிப்பைச் செய்யக் காத்திருக்கிறேன்" என்றேன்.

நண்பரின் அழைப்பை ஏற்று இங்கும் ஈற்றடிகளை வழங்கவிருக்கிறேன். பொதுவாக வாரத்திற்கோர் ஈற்றடியென அறிவன்தோறும் (புதன்) இடுகைகளைத் தரமுயல்கிறேன். முன்புபோல் நண்பர்கள் ஆதரவை நல்க வேண்டுமாறு கேட்டுக்கொள்கிறேன். என்வலையான வெண்பா எழுதலாம் வாங்க வலையிலும் திங்கள் தோறும் ஈற்றடி வழங்கி வெண்பா விளையாட்டைத் தொடர்ந்து நடத்திவருகிறேன். அங்கும் நண்பர்கள் அனைவரையும் பங்குபெற அழைக்கிறேன்.

அழைத்திட்டார் ஜீவா அழைப்புத் தனையேற்(று)
இழைத்தேன் இடுகைதனை இங்கு! -விழைந்தே
வழங்கீற் றடிக்கு வரைந்திடுவீர் வெண்பா
இயங்கும் இனியதமி ழில்!

இயன்றவரை இங்கு இனியதமிழ் செய்ய
முயன்றுவரும் முன்னோர்* முறையே -நயந்திவனும்
நற்றமிழில் பாப்புனைய நண்பர் குழாந்தனைப்
பொற்போ டழைக்கின்றேன் பூத்து!

முன்னோர்* -எனக்குமுன் இங்கு இடுகை செய்துவருபவர்கள்.

இவ்வாரத்திற்கான ஈற்றடி:- இனிய தமிழ்செய்வீர் ஈங்கு!

அகரம்.அமுதா

கோபம்: வெடித்ததும், புதைத்ததும்

2007-09-25T09:46:00.000+05:30

பேராசிரியர் பசுபதி 1999 டிசம்பரில் வெண்பா வடிக்கலாம் வா திரியில் மன்றமையத்தில்
வில்லியம் ப்ளேக்கின் பாடலை இட்டு வெண்பா வடிவம் கேட்டார். அப்போது வெளிவந்தவை:
I am angry at my friend
I told my wrath
My wrath did end
I am angry at my foe
I told it not
My wrath did grow

---William Blake

நண்பரிடஞ் சீற்றம் நவின்ற வுடன்தணியும்
வன்பகைமேல் மற்குத்தீ வாய்மூட லால்வளரும்;
நண்புபகை நம்மனத்து நாடகங்கள் என்பதனால்
தண்மையே சான்றோரின் சால்பு
--- பசுபதி, டொராண்டோ
என்னுள் ளெரிசினம் நண்பர்க் கியானெடுத்துச்
சொன்ன வுடன்தணிந் தேகிடும் -- அன்றியான்
வன்பகைமேற் சாடேனில் வன்மம் வளர்ந்தோங்கி
என்னையே வாட்டு மெரித்து
--- அனந்தநாராயணன், மக்மாஸ்டர்

பொங்கிவரும் வெஞ்சினமும் போக்கொழியும் நண்பரிடஞ்
சிங்கமெனச் சீறிட்ட வக்கணமே --- தங்கியுள்ளே
வாட்டிடுமாம் வன்பகைவர் மேற்காட்டா துட்புகைந்து
கூட்டைக் கொளுத்திடுந் தீ
---- வாஞ்சிநாதன்

இது போன்ற மொழிபெயர்ப்புகளைப் பலரின் கைவண்ணத்தில் வந்ததை, நான் இடுவதன் நோக்கம் எத்தனை சாத்தியக் கூறுகள் இருக்கின்றன என்பதை உணர வைப்பதுதான். இது வெண்பா இயற்றப் பயில்வோருக்கும், ஆரம்பநிலையில் இருப்போருக்கும், முயன்றால் எழுதலாம் என்ற எண்ணத்தைக் கொடுக்கும் என்று நான் நம்புவதால்தான் இடுகிறேன். அதோடு வேறுசிலர் இதெல்லாம் அந்தக் காலத்தில் எழுதிப் பயன்படுத்திய வடிவம் இந்த காலத்திற்குச் சரிப்பட்டு வராது என்று சுருங்கிக் கொள்கிறார்கள். அதுவும் சரியல்ல என்று நினைக்கிறேன். பழைய காலச் செய்யுள்களைப் படிப்பது படிவங்களை மனதில் வாங்கிக் கொள்ளவும், இக்காலத்தில் இயற்றப்படுகின்றவற்றைப் படிப்பது ஒரு ஊக்கத்தைப் பெற்றுக் கொள்ளவும் பயன்படும் என்று நினைக்கிறேன்.

ரோஜாப்பூ மல்லியகையான கதை

2007-09-19T07:25:00.000+05:30

மீண்டும் மொழிமாற்றி, பூமாற்றி, ஏமாற்று முயற்சி!
ஷேக்ஸ்பியரின் இக்கூற்று ஆங்கிலத்தில் ஞாபகத்திலிருந்து எழுதுகிறேன்:
What is there in a name? That we call a rose would in any other name,
smell as sweet.
பிழையிருந்தால் திருத்திய ஆங்கில வடிவத்தையும் இடும்படிக் கேட்டுக் கொள்கிறேன்:
இதோ நேரிசை வெண்பா வடிவத்தில்:

பெயராக எச்சொல்லைப் பெற்றாலும் ஆங்கே
உயர்வேது மப்பொருளுக் குண்டோ? -- மயங்கா
துரைத்திடுவாய் மல்லிகைக் குற்றபெயர் மாறின்
மறைந்திடுமோ வீசும் மணம்?

புவியினில் ஆரிவர் போல்!

2007-09-10T21:52:00.000+05:30

அன்புடையீர்,
நம்ம ஜீவ்ஸ் வாத்தியார் தான் நம்மை இங்கு அழைத்து வந்தார்.
இ.கொ. அவர்களும் எல்லா இடுகைகளிலும் என்னைத் தேடுவார். இருவருக்கும் நன்றி. சக உறுப்பினராக கடந்த பதிவில் கலக்கிய வாஞ்சி ஐயா அவர்களுக்கும் என் நன்றி. வெண்பா பதிவுகளுக்கு நல்லாதரவு வழங்கும் உங்களுக்கும் தான்.

ஒரு குழுமத்தில் இருபொருள் தரும் சொற்களை வைத்து சிலேடை வெண்பாக்கள் சில நகைச்சுவைக்க எழுதிவந்தேன். வழக்கம்போல் வரவேற்பும், எதிர்வினைகளும் இருந்தன.
அங்கு எழுதிய சில வெண்பாக்களை இங்கு இடுகிறேன்.

கவி என்பதற்கு ஆண்குரங்கு என்றும் ஒரு பொருள் உண்டல்லவா,
அதை வைத்து...

தன்பாட்டில் சேட்டைகள் தாராளம் செய்திடும்
கண்மூடிப் பார்க்குமுன் கைப்பற்றும் - எண்ணத்தில்
வாலென்றே எண்ணவும் வைத்தாலும் கையேந்தும்
கோலுக்கே ஆடும் கவி.

தலைக்கேறி வந்ததை தன்வழி ஆயும்
கலையெனில் செய்யுமலங் கோலம் - நிலையாய்
கவியென்ற பேரிவர்க்கு, கொள்கைப் பிடியில்
புவியினில் ஆரிவர் போல்!.

(நண்பர்கள் நகைச்சுவையாய் எடுத்துக்கொள்வீர்கள் என்று நம்புகிறேன் :-))

இதே போல, இருபொருள் தரும் சொற்களை வைத்து வெண்பா எழுதுங்கள், அல்லது'புவியினில் ஆரிவர் போல்' என்ற ஈற்றடியை/அல்லது அதுபோல ஒன்றனைக் கொண்டு வஞ்சப்புகழ்ச்சியாகவோ நகைச்சுவையாகவோ எழுதுங்கள்.

என்ன, தொடங்கலாமா?

ஒப்பாரியுடன் என் முதல் இடுகை!

2007-09-05T10:22:00.000+05:30

இலவசக் கொத்தனாரும் ஜீவ்ஸும் என்னை இதில் எழுதும்படி கேட்டிருந்தார்கள்.
கொஞ்சம் பழைய சரக்கை அவிழ்த்து விடுகிறேன். வெறும் 2500 வருடப் பழைய கதைதான்.

மன்றமையத்தில் 1999இல் வெண்பா வடிக்கலாம் வா என்ற தொடரில் இடம் பெற்றதை மீண்டும் இங்கே இடுகிறேன். அதன் பழைய இடுகைகளை எப்படித் தோண்டியெடுப்பது என்று தெரியவில்லை.

அருளரசன் என்பவர் அப்போது கிரேக்க நாடகாசிரியரின் கருத்தொன்றை ஆங்கிலத்தில் வெளியிட்டு அதை வெண்பா வடிவில் செய்ய முயலலாமா என்று கேட்டிருந்தார்.

If it were possible to heal sorrow by weeping and to raise the dead with tears, gold were less prized than grief.

----Sophocles

இந்த மாதிரி மொழிபெயர்ப்பு வேலையை வெண்பாவைக் கற்றுக்கொள்ளும் பயிற்சியாக அப்போது பலரும் முயன்றோம். பெரியண்ணன் சந்திரசேகரன்தான் அப்போது எங்களுக்கு இணையவழி யாப்பிலக்கண ஆசிரியர். எங்களுடைய இடுகைகளைத் திருத்திப் பிழைகளைச் சுட்டிக் காட்டிச் செம்மையாக்குவதற்கு ஊக்கமளித்த அவரின் ஆர்வம் இப்போது நினைக்கும்போதும் ஒரு வேகத்தையளிக்கிறது.

அருளரசனின் முயற்சி:

ஒப்பாரி யால்சோகம் போகாது போனவுயிர்
இப்பாரில் கண்ணீரால் வாராது -- துப்பார்க்குச்
சிக்காத உண்மையிது போகும் வருமெனில்
துக்கத்திற் கீடில்லை பொன்.

ஆசிரியர் பெ. சந்திரசேகரனின் வடிவம்:

அழுது புரண்டாலும் ஆழ்ந்திருக்குஞ் சோகம்
பழுதின்றிப் போயொழிவ(து) இல்லை --- பொழிகண்ணீர்
என்செய்யும் போந்தோர் எழுந்துவரப் பொய்யெனிற்
பொன்னைவிஞ் சாதோ புலம்பு

என்னுடைய முயற்சி:

பிரிந்தோரை மீண்டும் பெறுதற்குக் கண்ணீர்
சொரிதலே போதுமெனிற் சொல்வீர் -- பெரிதென்று
போற்றுவரோ இப்புவியில் பொன்னைத்தான் சற்றேனுந்
தேற்றமுடை மாந்தர் தெரிந்து.

என்னும் எத்தனை வடிவங்கள் இங்கு பங்குகொள்வோரிடமிருந்து வருகின்றன என்று பார்க்கலாமா?

வெண்பாவில் பஞ்ச் டயலாக் வைப்பது எப்படி?

2007-07-10T16:44:00.001+05:30

பஞ்ச் டயலாக் அப்படின்னு பேரைப் பார்த்ததும் உள்ள வந்துட்டீங்கதானே! வெல்கம் வெல்கம். வந்ததுதான் வந்தீங்க என்ன எழுதி இருக்குன்னு பார்த்துட்டுப் போயிடுங்களேன்.

போன முறை நாம் வெ.வ.வா தொடரில் அகிலத்தைக் காப்பதென் ஆவல் அப்படின்னு ஒரு ஈற்றடி கொடுத்து அதுக்கு நானும் வெண்பா வாத்தியும் சேர்ந்து வெண்பா எல்லாம் கூட எழுதிட்டோம். அப்போ வந்த வாஞ்சிநாதனும் ஓகையாரும் இப்படி எல்லாம் ஈற்றடி குடுக்கக்கூடாது இலக்கணப்படி இது தப்பு அப்படின்னு சொல்லிட்டாங்க. ஈற்றடி எழுதறதுக்கு ஒரு வாய்ப்பாடு இருக்கிறது தெரிஞ்ச விஷயமுன்னாலும் அதில் எப்பவுமே கொஞ்சம் சந்தேகம்தான். அதனால ஓகையாரைப் பிடிச்சு அந்த வாய்ப்பாடை பிரிச்சு மேயுங்க அப்படின்னு சொன்னேன். அவர் தந்ததுதான் இன்றைய பதிவு. இனி ஓகையார்.

_____________________________________________________________________
மரபுக் கவிதை வகைகளில் சற்றே கடினமான இலக்கணத்தை உடையது வெண்பா என்று சொல்லலாம். இதற்கான கடைசிச் சீருக்கு தனியாக இலக்கணமும் வாய்பாடும் அமைத்திருக்கிறார்கள். இந்த ஈற்று சீர் கீழ்க்கண்ட கட்டுப்பாடுகளுக்குள் அடங்க வேண்டும்:

1. மூவசைச் சீர் வரக்கூடாது.

2. ஓரசைச் சீர்களான நேரசை மற்றும் நிரையசைச் சீர்கள் வரலாம்.

3. ஈரசைச் சீர்களில் எல்லாவகை சீர்களும் வரமுடியாது. வெண்பாவின் ஈற்று சீராக வரும் ஈரசைச் சீர்களுக்கு இரண்டு கட்டுப்பாடுகள் இருக்கின்றன. ஒன்று - அச்சீர் நேரசையில் முடியவேண்டும். இரண்டு - நேரசையில் முடிந்தாலும் அச்சீர் உகர குறில் உயிர்மெய்யாக இருக்க வேண்டும். (ஆடு - சரி; ஆடுக, ஆடா, ஆடி, ஆடை, ஆடோ, ஆவல் - எல்லாம் தவறு)

இக்கட்டுப்பாடுகளை இனி எடுத்துக்காட்டுகளுடன் விளக்கமாக பார்க்கலாம்.

முதற்கண் ஏன் இந்தக் கட்டுப்பாடுகள் என்பதற்கான சிறு விளக்கம். வெண்பாவுக்கான அனைத்து விதி முறைகளும் அந்தப் பாடலை நாம் படிக்கும் போது ஒருவித ஓசை நயம் வரவேண்டும் என்பதற்காகவே ஏற்படுத்தப்பட்டுள்ளன. இந்த ஓசை 'செப்பலோசை' என்று அழைக்கப்படும். இவ்வோசையை விளக்கிப் புரியவைப்பது என்பது ஏறக்குறைய இயலாத செயல். இதை அனுபவித்தே உணர முடியும். சில அருமையான வெண்பாக்களைப் பாருங்கள்.

சாதி இரண்டொழிய வேறில்லை சாற்றுங்கால்
நீதி வழுவா நெறிமுறையில் - மேதினியில்
இட்டார் பெரியோர் இடாதார் இழிகுலத்தோர்
பட்டாங்கில் உள்ள படி.

(பட்டாங்கு = பழைய நூல்கள்)

இதனை இதனால் இவன்முடிக்கும் என்றாய்ந்து
அதனை அவன்கண் விடல்.

இப்பாடல்களை படிக்கும் போது நாம் உணரும் ஓசை நயமே செப்பலோசை. இவ்வோசைக்கு ஏற்ப வெண்பாக்களின் முடிவில் முத்தாய்ப்பாய் சிறிய ஓசையுடைய சீரைப் பயன்படுத்துமாறு விதிகள் அமைத்திருக்கிறார்கள். இதன் முக்கியத்துவம் கருதி இதற்கான தனி வாய்பாடுகளைத் தந்திருக்கிறார்கள். அவை நாள், மலர்,காசு,பிறப்பு என்பனவாகும்.

நாள் மற்றும் மலர் இவையிரண்டும் ஓரசைச் சீர்களான நேர் மற்றும் நிரையசைகளைக் குறிக்கும். இவற்றில் பெரிதாக குழப்பம் இருக்காது.

காசு மற்றும் பிறப்பு என்பன ஈரசைச் சீர்கள் ஆனாலும் இவற்றை நேர்பு மற்றும் நிரைபு என்று குறிப்பிடுவர். இச்சொற்கள் பெரும்பான்மை குற்றியலுகரமாக இருக்கும். (தனக்குரிய மாத்திரை அளவிலிருந்து அரை மாத்திரை குறைந்து ஒலிக்கும் சொற்கள் குற்றியலுகரமாகும். குறைந்த ஓசையுடைய சொற்கள் என்ற அளவில் இப்போது புரிந்து கொண்டு மேல் செல்லலாம். ஏனெனில் குற்றியலுகரத்தை விவரித்தால் அது ஒரு தனி பதிவு அளவுக்கு நீண்டுவிடும்.)

ஈற்று சீருக்கு எடுத்துக் காட்டுகள்:

நாள் - கல், கா, கால்
மலர் - கடா, கடி, கடல்
காசு - காது, சாந்து, கொக்கு
பிறப்பு - கலப்பு, குடகு, விறகு, படகு, துடுப்பு

திருக்குறள் முதல் அதிகாரத்தில் இருக்கும் பத்து குறள் வெண்பாக்களின் ஈற்றுச் சீர்கள்

உலகு - நிரைபு = பிறப்பு,
எனின் - நிரை = மலர்,
வார் - நேர் = நாள்,
இல - நிரை = மலர்,
மாட்டு - நேர்பு = காசு,
வார் - நேர் = நாள்,
அரிது - நிரைபு = பிறப்பு,
தலை - நிரை = மலர்,
தார். - நேர் = நாள்.

வெண்பா மட்டுமல்லாமல் வேறு சில பா வகைகளுக்கும் இந்த ஈற்று சீர் இலக்கணம் அமையும்.
_____________________________________________________________________

என்ன புரிஞ்சுதா? சந்தேகம் இருந்தா இங்க கேளுங்க. ஓகையாரும் மற்றவங்களும் உங்க சந்தேகத்தைத் தீர்த்து வைப்பாங்க. நீங்க பஞ்ச் டயலாக்கை வெண்பாவின் கடைசி அடியில் வைக்கும் பொழுது இந்த விதிமுறைகளை எல்லாம் பின்பற்றணும். ஓக்கேவா?

சரி இந்த விதிகளுக்கு எல்லாம் உட்பட்ட இந்த வாரத்தின் ஈற்றடி -

எண்ணிக்கை ஏழா இயம்பு

இயம்பு - நிரைபு (பிறப்பு என்பது போல்) என்பதால் ஈற்றடி சரியாகவே இருக்குன்னு நினைக்கிறேன். அதான் ஏழு அதிசயங்கள் அப்படின்னு ஒரு கூத்து நடந்து இருக்கே. அதை வெச்சு எழுதுங்க மக்கா.

அகிலத்தைக் காப்பதென் ஆவல். (வெ.வ.வா)

2007-07-01T17:09:00.000+05:30

ரொம்ப நாள் கழிச்சு எங்க வெண்பா வாத்தி ஜீவ்ஸுக்கு மூச்சு விட நேரம் கிடைச்சு இருக்கு. அவரு இந்த வெண்பா பக்கம் வருவாருன்னு பார்த்தா நைஸா படம் பிடிக்கப் போயிட்டாரு. எங்க அப்படியே போயிடப் போறாரோன்னு நினைச்சு, அவரு கிட்ட போயி ஒரு ஈற்றடியைக் குடுத்து இதுக்கு மூணாவது நாலாவது அடி எழுதியாச்சு,மொத ரெண்டு அடி எழுதிக் குடுமய்யான்னு இழுத்துக்கிட்டு வர வேண்டியதாப் போச்சு.

எந்த தலைப்பில் வெண்பா எழுதலாமுன்னு யோசிக்கும் பொழுது இன்னமும் அந்த சுற்றுச் சூழல் விழிப்புணர்வைப் பற்றி போட்ட வெண்பா பதிவின் தாக்கம் இன்னும் இருப்பது புரிந்தது. சரி அந்த தலைப்பிலேயே மேலும் ஒரு வெண்பா வடிக்கலாம் வா தொடர் பதிவு போடலாம் என நினைத்து எடுத்துக் கொண்ட ஈற்றடிதான் - அகிலத்தைக் காப்பதென் ஆவல்.

அவரும் நானும் கொஞ்ச நேரம் அடிச்ச மின்னரட்டையிலேயே அந்த வெண்பாவை முடிச்சது மட்டுமில்லாம அடுத்ததா வேற ஒண்ணு எழுதிட்டோம். இப்படி ரெண்டு பேர் சேர்ந்தா கொஞ்ச நேரத்தில் வெண்பா எழுத முடிஞ்சா நம்ம எல்லாரும் சேர்ந்தா இந்த உலகத்துக்கு எதாவது நல்லது செய்ய முடியாது?
நம்மாலான நல்லது செய்வோம். அதுக்கு முன்னாடி கு்டுத்து இருக்கிற ஈற்றடிக்கு வெண்பா எழுதுவோம். வாங்க மக்கா! இந்த இடுகைக்கான ஈற்றடி

அகிலத்தைக் காப்பதென் ஆவல்.

இதுக்காக நானும் வாத்தியும் சேர்ந்து எழுதின வெண்பாக்கள் -

பகர நினைத்தால் பதைக்குதென் உள்ளம்
சகலமும் சட்டென் றடங்குதே, நாளும்
திகிலாய் இருக்குது தீங்கினைப் பார்க்க
அகிலத்தைக் காப்பதென் ஆவல்

பனியும் உருகியே போகுது பாழாய்
சனியும் புவியினைப் பீடிக்க - இனியும்
சகிப்பது தப்பு சரியில்லை இன்றே
அகிலத்தைக் காப்பதென் ஆவல்

16. தேவையா பெண்கள் தினம்? (வெ.வ.வா)

2007-03-08T10:02:00.000+05:30

நம்ம ஓகை நடராஜன் அவரோட 50ஆவது பதிவை மகளிர் தின சிறப்புப் பதிவா ஒரு நிலை மண்டில ஆசிரியப்பா போட்டு கலக்கி இருந்தாரு. சரி நாமும் வெண்பாப் பதிவு போட்டு கொஞ்ச நாள் ஆச்சே அப்படின்னு அவரோட ஐடியாவைக் காப்பி அடிச்சு ஒரு வெண்பா பதிவு போடலாமுன்னு முடிவு பண்ணியாச்சு.

அதனால இன்னிக்கு ரொம்ப கதை எல்லாம் கிடையாது. வலைப்பதியும், பதியாத மகளிர் அனைவருக்கும் நம்ம மகளிர் தின வாழ்த்துக்கள். வலைப்பூக்களை மேய வரும் மக்கள்ஸ் அவங்க வீட்டில் இருக்கும் மகளிருக்கு நம்ம சார்புல வாழ்த்து சொல்லிடுங்க. இந்த பக்கமே வராம இருக்கும் பொன்ஸ் இதுக்காவது வராங்களான்னு பார்க்கலாம்! :)

இன்னியோட ஈற்றடி - தேவையா பெண்கள் தினம்?

நம்ம முதல் போணி வெண்பா போட்டுடறேன். வழக்கம் போல வந்து வெண்பா எழுதி விளையாடிடுங்க. வெண்பா எழுத மாட்டேன்னு அடம்பிடிக்கும் மக்கள் என்ன செய்யணுமுன்னு உங்களுக்கே தெரியும். சரிதானே!

தேவைகள் எல்லாமே தீரவே வந்திங்கு

சேவைகள் செய்திடும் செல்வங்கள் - நம்குலப்

பாவையரைப் போற்றுவீர் பைந்தமிழில் நித்தமுமே

தேவையா பெண்கள் தினம்?

15.புகையில் வரும்நோய்தான் புற்று (வெ.வ.வா)

2007-01-18T07:20:00.000+05:30

இந்த விக்கி பசங்க பதிவு ஆரம்பிச்சாலும் ஆரம்பிச்சோம், மத்த பதிவை எல்லாம் கவனிக்க முடியாமலேயே போச்சு. இலவசம் பக்கமாவது போனேன் ஆனா இந்த வெண்பா பதிவு பக்கம் வரவேயில்லை. நாந்தான் வரலை, நம்ம வெண்பா வாத்தி இந்த பக்கம் மழைக்குக் கூட ஒதுங்கறது இல்லை அப்படின்னு முடிவோட இருக்காரு. புயலாராகட்டும், ஓகையாராகட்டும் வெண்பா எழுத வரச் சொல்லி அலுத்தே போயிட்டாங்க. அதுனாலதான் அடுத்த பதிவு வெண்பா பதிவாகத்தான் இருக்க வேண்டுமென்று ஒரு முடிவோட இந்த பதிவு.

நம்ம பதிவுல வேற சரக்கே இல்லை, மாவரைக்கும் பதிவு அப்படின்னு எல்லாம் வேற மக்கள் பல்லு மேல நாக்கு போட்டு பேசிட்டாங்களா, நமக்கு ரொம்ப வருத்தமாப் போச்சு. அதுனால இந்த பதிவில் ஒரு சமூகச் சிந்தனையை முன் வைக்கலாமுன்னு முடிவு பண்ணியாச்சி. அதுக்கு எடுத்துக்கிட்ட தலைப்புதான் புகை உடலுக்குப் பகை.

ஒரு சின்ன விதிமுறை மாற்றம். இந்த முறை கொடுக்கப்பட்ட ஈற்றடிதான் எல்லோரும் எடுத்தாள வேண்டும் என்ற கட்டாயம் இல்லை. இக்கருத்தை வெளிப்படுத்தும் வெண்பாவாக இருக்க வேண்டும். அதுதான் விதி. வெண்பா என்றாலே பின்னங்கால் பிடரியில் பட ஓடும் நண்பர்கள், ஒரு உள்ளேன் ஐயாவாவது போட்டு பதிவு தமிழ்மண முகப்பில் இருக்குமாறு பார்த்துக் கொள்வீர்கள் என நம்புகிறேன்.

புலியைப் பார்த்து பூனையும் சூடு போட்டுக்கொண்டதான் என்னும் பழமொழிக்கேற்ப நம் புயலாரைப் பார்த்து நானும் யமகம் எழுத ஆசைப்பட்டேன். சரியாய் வந்திருக்கிறதா எனப் பெரியோர்கள் சொல்லவேண்டும்.

புகையில் பலர்நெஞ்சு புண்ணா வதைவெம்
புகையில் திரைப்படத்தில் பார்த்தேனே நம்சிம்
புகையில் சிகரெட்டை, பாங்கென வேநம்
புகையில் வரும்நோய்தான் புற்று

மிகுந்த தாமதத்திற்குப் பின் வந்திருக்கும் வெண்பா வடிக்கலாம் வா பதிவு. ஆகையால் கட்டுண்டு கிடந்த கற்பனையைத் தட்டிவிட்டு அமோகமான வரவேற்பு தருவீர்கள் என்ற நம்பிக்கை இருக்கிறது!

14. யார்தருவார் தீதிலா தீர்ப்பு (வெ.வ.வா)

2006-10-06T04:50:00.000+05:30

ரொம்ப நாள் கழிச்சு நம்ம வெண்பா வாத்தியை இன்னைக்கு யாஹு சாட்ல பிடிச்சேன். அவரும் நம்மளை பிலுபிலுன்னு பிடிச்சுக் கிட்டாரு. நாந்தான் வேலைப் பளு காரணமா வர முடியாம இருக்கேன்னா நீ ஏன் வெண்பா வடிக்காம இருக்கன்னு கேட்டு நம்மளை வாட்டி எடுத்துட்டாரு. அவரை மெதுவா கூல் டவுண் பண்ணி நாட்டு நடப்பெல்லாம் பேச ஆரம்பிச்சோம். அப்படியே பேச்சு தமிழ்மணம் சைடா திரும்புச்சு.

இப்போ என்ன ஹாட் டாபிக் ஓடுதுன்னு கேட்டாரு. நானும் இப்போதைக்கு மக்கள் ஆர்வமா அடிச்சிக்கற விஷயம் பரிணாம வளர்ச்சிதான்னு சொன்னேன். அப்படியே அவருக்கு evolution vs intelligent design என்கின்ற லெவலில் நம்ம மக்கள் பேசறது எல்லாம் சொன்னேன். ஆஹான்னு கேட்டுக்கிட்டாரு. பேச்சு மெதுவா விஞ்ஞானம் பற்றி வெண்பாவில் பேசினா என்னன்னு போச்சு. நானும் உடனே இந்த இரண்டு விஷயங்களுக்கும் முடிச்சுப் போட்டு, நாமளும் பரிணாம வளர்ச்சி பத்தி பதிவு போடலாம் ஆனா அதை வெண்பா வடிக்கலாம் தொடரா போடலாமுன்னு சொன்னேன்.

முதல் முயற்சியாய் இந்த வெண்பாவையும் எழுதி அவரு கிட்ட காமிச்சேன்.

பரிணாமம் பற்றி பலகருத்து பார்த்தேன்
அறியாமல் ஆசையுற்றேன் நல்ல புரிதலுக்கே
பார்தனிலே பல்லுயிரும் வந்த விதம்பற்றி
யார்தருவார் தீதிலா தீர்ப்பு

வாத்தியும் விடாமா இதுக்கெல்லாம் ஒரு பட்டிமன்றமா வேணும். எல்லாம் அவன் செயல், அதைப் பத்தி நாம ரொம்ப கவலைப்பட வேண்டாம். நம்ம வேலையைப் பார்ப்போம் எனச் சொல்லி

மச்சமுதல் மூவடி வாமனம் சிங்கமொடு
மிச்சமும் மண்ணுலகை காக்கவென - வச்சு
பரிணாமத் தோற்றம் பகன்ற இறைவன்
ஹரிநாமம் சொல்லலாம் வா!

என ஒரு வெண்பாவை எழுதி நம்ம வாயை அடைக்கப் பார்த்தாரு. அப்படி எல்லாம் விட்டுருவோமா? என்ன, கொஞ்சம் சப்போர்ட் வேணும். மக்களே, இங்க வந்து வெண்பாவில் இந்த விவாதத்தை தொடருங்கப்பா. கேள்விகளுக்கு பதில் சொன்னாலும் சரி, மேல கேள்வி கேட்டாலும் சரி, கேட்ட கேள்விகளை மெருகூட்டினாலும் சரி,வந்து வெண்பாக்களை எழுதிப் போடுங்கப்பா. அதோட இந்த தொடரை அம்போன்னு விட்டதுக்காக என் சைடுலேர்ந்து ஒரு மன்னிப்பும் கேட்டுக்கறேம்பா.

பட உதவி - இத்தளம்

13 - ஆறுமுகமான பொருள் நீயருள வேண்டும்

2006-06-29T23:20:00.000+05:30

ஆறு விளையாட்டுக்கு நம்மள அழச்ச கொத்தனாருக்கு நன்றி.

முதல்ல ஒவ்வொரு படை வீட்டிற்கும் ஆறு செய்யுள்.. மொத்தம் முப்பத்தாறு செய்யுள் அப்படின்னு கணக்கு போட்டா... முத ரெண்டு எழுதறப்பவே கண்ணக் கட்டுது.. உஸ்ஸ் அப்பா... அந்த கதவத்திறங்கப்பா காத்து வரட்டும்...

நான் அடிக்கடி படித்த புத்தகங்களில் இந்த கதவைத்திற காற்று வரட்டும் இடம் பெறும்

வரிசையில சொல்லனும்னா

1 - பொன்னியின் செல்வன்
2 - சிவகாமியின் சபதம்
3 - கடல்புறா
4 - யவன ராணி
5 - மனசே ரிலாக்ஸ் பிளீஸ்
6 - கதவைத் திற காற்று வரட்டும்.

இப்படியா படிச்சுட்டு இருக்கிறப்ப தான் நமக்கு இந்த வெண்பா பைத்தியம் பிடிச்சது. எனக்கு இசையும் புத்தகமும் இருந்தா போதும்... மத்ததெல்லாம் தூரம் தான்... அதுவும் தெய்வீக இசைகள்னா கேக்கனுமா..

முருகனின் ஆறுபடைவீடுகளைப் பற்றிய

1 ஆறுபடை வீடு கொண்ட திருமுருகா கேட்டிருக்கீங்களா...

திருப்புகழ்ல கூட

2 ஏறுமயி லேறிவிளை யாடுமுக மொன்றே
ஈசருடன் ஞானமொழி பேசும்முக மொன்றே
கூறுமடி யார்கள்வினை தீர்க்குமுக மொன்றே
குன்றுருவ வேல்வாங்கி நின்றமுக மொன்றே
மாறுபடு சூரரை வதைத்தமுக மொன்றே
வள்ளியை மணம்புணர வந்த முகமொன்றே
ஆறுமுக மானபொருள் நீயருளல் வேண்டும்
ஆதியரு ணாசல மமர்ந்த பெருமாளே....

அப்படின்னு அருணகிரியார் உருகியிருப்பார். இதையும் விட பிடிச்ச பாட்டுன்னா அது

3 " முத்தைத் தருபத்தி திருநகை " தாங்க.. என்ன ஒரு சந்தம் அப்பா...

அருணகிரியார் எழுதிய பல்லாயிரக்கணக்கில் நமக்கு மிச்சம் இருப்பது ஆயிரத்து சொச்சம் மட்டுமே..

பழைய "மோட்டார் சுந்தரம் பிள்ளை" படத்துல ஒரு பாட்டு வருங்க

4 " மனமே முருகனின் மயில் வாகனம்..
என் மாந்தளிர் மேனியெ குகனாலயம் "

அப்படின்னு..

என்ன ஒரு சிந்தனை பாத்திங்களா.. கண்ணதாசன் எழுதினார்னு நினைக்கிறேன். எந்த இடத்திலும் இருக்கிற கந்தன் உன் மனதிலேயே பார்க்கலாமேங்கறார்.. அதைத் தானே திருமூலர் கூட

5 "உள்ளம் பெருங்கோயில் ஊனுடம்பாலயம்
தெள்ளத் தெளிந்தார்க்கு சீவன் சிவலிங்கம்
வள்ளல் பிரானார்க்கு வாயும் ஒரு கோபுரம்
கள்ளப் புலனைந்தும் காளா மணிவிளக்கே"

அப்படின்னு பாடியிருக்கார்( நினைவில இருந்து எழுதுறேன் தப்பு இருந்தா போட்டு தாக்கிடாதீங்க ). . கண்ணதாசனோட பல தத்துவ பாடல்களில் சித்தர் பாடல்களின் தாக்கம் இருக்கும்.

நம்ம பித்துக்குளி முருகதாஸ் அப்படின்னு ஒரு பாடகர்.. ரொம்ப அற்புதமா பாடுவார்.. அவர் பாடின

6 " நாடறியும் நூறுமலை நானறிவேன் சுவாமி மலை.. " அப்படியே மனச அள்ளிட்டு போகுங்க

அதெல்லாம் கிடக்கட்டும் நாம வெண்பா மாலைக்குள் போகலாமா

பாமாலை அப்படிங்கறது அந்தாதி மாதிரி தான்.. என்ன ஒரே வித்தியாசம்னா.. முதல் பாடலின் முதல் எழுத்தோ அல்லது வார்த்தையோ கடைசிப்பாடலின் ஈற்றடியில கடைசி வார்த்தையாவோ இல்லை கடைசி எழுத்தாவோ வரனும் .. அவ்வளவு தான்...

ஆறுபடை வீடு - வெண்பா மாலை

திருப்பரங்குன்றம் :

குன்றிலே தேவானை கைப்பிடித்த கந்தனும்
மந்திரப் புன்னகைக்கும் மன்றிலே - செந்தில்
புகழ்பாடி யாற்றுப் படைபாடி கீரர்
அகமகிழ் தந்த இடம்

திருச்செந்தூர்

இடவலத்தில் தேவி யிருவர் துணையாம்
விடகண்டன் மைந்தனாம் வேலன் - கடலோரப்
போரின் சினம்தணிந்த புன்னகைப் பார்த்ததுமே
நேரில் நிலையா வினை.

திருவாவினன்குடி

வினைகளை தீர்த்திடும் வித்தகனே கந்தா
சினைத்ததோர் ஞானக் கனியே - தனித்தவுனை
சிந்தையில் வைத்த சிறுமுனிக்கு நற்றமிழ்
சந்தமும் தந்தபழம் நீ

சுவாமிமலை

நீலகண்ட னோடமர்ந்து ஞானப் பொருளுரைத்த
வேலன் உமைபாலன் வேண்டினர்க்கு - நாளுமே
காலனின் தீதடங்க் காத்தருள் செய்திடும்
ஞால முதல்வனை நாடு

திருத்தணி

நாடுவிட்டு நற்சோலை நங்கையை தேடியே
காடுவந்த் கோமகனாம் கந்தனும் - வேடுவ
கள்ளியைத் தேடியவன் வந்ததொரு மாமலையில்
வள்ளி மனம்கவர்ந்த வேல்

பழமுதிர்சோலை

வேலெடுத்த கைதனில் வேல்முருகன் ஔவைக்காய்
கோலெடுத்த கையுடன் நின்றதிருக் - கோலத்தில்
குன்றினில் நின்றான் குமரனும் நற்சுவைக்
குன்றாத செந்தமிழுக் கு
*****************

முருகனைப் பத்தி பேசும்போது வாரியாரை நினைக்காம இருக்க முடியுமா
அவரோட எந்த மேடைப்பேச்சும் முடிக்கும் முன்னாடி சொல்ற பாடல்

உருவாய் அருவாய்
.. உளதாய் இலதாய்
மருவாய் மலராய்
..மணியாய் ஒளியாய்
கருவாய் உயிராய்
..கதியாய் விதியாய்
குருவாய் வருவாய்
..அருள்வாய் குகனே
***************

அடுத்த பதிவில சந்திக்கலாம் ..

அதுவரைக்கும்

அன்புடன்

ஜீவா

12. வெண்பா அந்தாதி (வெ.வ.வா)

2006-06-13T08:08:00.000+05:30

இந்த வெண்பா வடிக்கலாம் வா தொடரில் போன தடவை நாம போட்ட ஈற்றடி தரமாய்ப் பதிவொன்று தா. இந்த தொடரில் தொடர்ந்து பங்கடுக்கும் வெகு சிலரில் ஒருத்தர்தான் நம்ம பொன்னரசி. ஆனா பாருங்க, புதரகத்துக்கு வந்த பின் அவங்க ரொம்ப மாறி போயிட்டாங்க. வெண்பா எழுதறதெல்லாம் விட்டுட்டாங்க. அவங்க எழுதின ரெண்டு வரி இது.

கரம்பற்றிப் பதிவுக்குக் கொணர்ந்தோம் வெவாவைத்
தரமாய்ப் பதிவொன்று தா

தளையெல்லாம் தட்டுதேன்னு அவங்க தலையைத் தட்டி, அதை கொஞ்சம் சரி பண்ணி இப்படிப் போட்டு குறட்பாவா இருக்கறத அளவியல் வெண்பாவா மாற்ற கூட ரெண்டு வரி எழுதுங்கன்னு சொன்னேன்.

கரம்பற்றிப் கொண்டுவந்தோம் கற்றுதரத் தானே
தரமாய்ப் பதிவொன்று தா

அவங்க எழுதிக்கிட்டு வரவரைக்கும் பொறுமையில்லாம நானே அதையும் எழுதினேன். அது இப்படிப் போச்சு.

வெண்பா வடிப்பதை வேடிக்கை தான்பார்த்தோம்
பண்பாடும் வித்தை படிக்கவே நண்பா
கரம்பற்றிக் கொண்டுவந்தோம் கற்றுதரத் தானே
தரமாய்ப் பதிவொன்று தா

அதை எழுதி முடிச்ச உடனே வரிசையாய் ஒரு ரெண்டு மூணு வெண்பா எழுத கை வந்தது. சரி எழுதறோமே, புதுசா எதாவது முயற்சி பண்ணலாமேன்னு நினைச்சப்போ வந்ததுதான் இந்த அந்தாதி ஐடியா. அந்தாதின்னா என்னன்னு நம்ம எல்லாருக்கும் தெரியும். முதல் வெண்பாவின் கடைசி சொல்லோ கடைசி எழுத்தையோ அடுத்த வெண்பாவின் முதல் வார்த்தையாவோ எழுத்தாவோ வச்சு வெண்பா வடிக்கறதுதான் இந்த விளையாட்டு. போன வெண்பாவை 'தா' என முடித்ததை அடுத்து எழுதிய வெண்பாக்கள் இவை.

தானாய்ப் படிக்கத் தயக்கமா யானதே
வீணாகப் போனதே வாழ்க்கையே - காணாத
இன்பத்தைக் காட்டிடவே எங்களுக்கு வாய்த்தவொரு
வெண்பாவின் வாத்தியே வா

வாராது போகுமோ வார்த்தைகள் கோர்வையாய்
தேறாது என்றிடுமோ தேசமே - கூறாதே
வெண்பா வடிக்கவே வேண்டுமென்று நீயின்று
பண்பாய் விதியெல்லாம் பார்

பார்த்தாலே போதும் பரவசம் பொங்கிடும்
நேர்த்தியாய் வெண்பாவை நீரெழுதி வந்தாலே
கோர்த்தநல் முத்தாய் குறையற்ற வார்த்தைகள்
சேர்த்த திறனே சிறப்பு.

நல்லா இருக்கா? இந்த வெண்பா விளையாட்டை தொடருங்களேன். 'சிறப்பு' அல்லது 'பு' எனத் தொடங்கும் வெண்பாவை எதிர்பார்க்கிறேன். முடிஞ்ச வரை தளை தட்டாம எழுதிப் பாருங்க. எதுகை மோனை எல்லாம் இணைஞ்சு வந்தா இன்னும் நல்லா இருக்கும். விதிகளை படிக்கணும்ன்னா இந்த பதிவையும் அதன் பின்னூட்டங்களையும் கொஞ்சம் போய்ப் பாருங்க.

இன்னுமொரு விஷயம். கடைசியாய் வந்த வெண்பா எடுத்து அடுத்த வெண்பா போடணும். அதனால வெண்பாக்களும் அது பற்றிய விளக்கங்களும் மட்டும் பின்னூட்டமா இருந்தா நல்லா இருக்கும். நம்ம வழக்கமான பின்னூட்ட விளையாட்டு இங்க வேண்டாமே. அதுக்குத்தான் நம்ம பழைய பதிவுகள் இருக்கே. அங்க ஜமாய்ங்க. (ஆஹா இந்த பதிவுக்கு 10 பின்னூட்டம் கூட வராதுன்னு நம்ம வைத்தியர் கை கொட்டிச் சிரிக்கறாரு. ரொம்ப அசிங்கப்படுத்தாதீங்க மக்கள்களா.)

11: மழையுந்தான் பெய்யும் மிக (வெ.வ.வா)

2006-06-03T20:02:00.000+05:30

யாரங்கே..

நாந்தாங்க ஜீவா

என்னாச்சு.. ஒரு வெண்பா தொடர் எழுதுனா அத ஒழுங்கா எழுத வராதா .. இப்படி தான் அடிக்கடி விட்டுட்டு போறதா ??

அவ்.... அவ்வ்..... ( நன்றி கைப்புள்ள )

அழுதா எல்லாம் விடப்போறதில்ல.. பதில் சொல்லியே ஆகனும்

அது எங்க அலுவலகத்துல அலுவல் அதிகமா.. கூடவே சொந்தவேலையும் அதிகமாய்டிச்சா அதா வர முடியல..

அப்ப லீவு சொல்லிட்டு போகவேண்டியது தானே ??

" தப்பு தப்பு தப்பு.. 10 தோப்புக் கரணம் போட்டாச்சு போதுமா "

சரி சரி இந்த வாரம் என்ன ஈற்றடி ??

ஈற்றடியா இல்லாம கடைசி ரெண்டு வரி நான் எழுதுவேனாம்.. முதல் ரெண்டு வரி மத்தவங்க எழுதுவாங்களாம்..

****

மக்களே.. வேற ஒண்ணுமில்லீங்க... லீவு சொல்லாம போனதுக்கு காரணம் வேலை வேலை வேலை.. அதைத் தவிர வேறெதுவுமில்லை.. லீவு சொல்லாம போனதுக்கு மன்னிச்சுக்கோங்க..

மேலே மனசாட்சிக்கு சொன்ன பதில் தான். ஈற்றடிக்கு பதில் ரெண்டு வரி எழுதப் போறேன்.. முதல் ரெண்டு அடிய நீங்க எழுதுங்க ( ஹையா ஈசி அப்படின்னு யாரோ சொல்ற மாதிரி கேக்குதே .. ஆற்றலரிசியா ?? )

***

இதோ என்னுடைய இரண்டடி :

பிழையிலாச் சிந்தை பெருமக்கள் பேணில்
மழையுந்தான் பெய்யும் மிக

அன்புடன்
ஜீவா

10 : கரம்பிடித்த என்கணவர் காண் - (வெ.வ.வா)

2006-04-23T00:26:00.000+05:30

வெண்பா - பொது விதிகள்.
***************************

சரசுவும் கமலாவும் உங்களுக்கு ஏற்கனவே சூடான நெய்யப்பம் தா வில் அறிமுகமானவர்கள் தான். சரசு எதிர்வீட்டு கமலாக்காவிடம் பேசிக் கொண்டு இருக்கிறார்.

அக்கா.. யக்காவ்.. என்ன பண்ணிட்டு இருக்கக்கா ?

அத யேண்டி கேக்கற சும்மா இருந்த சங்க ஊதிக் கெடுத்தானாம் ஆண்டிங்கற கதையா சீரு
செறப்புன்னு அன்னைக்கு என்னமோ இலக்கணம் சொல்லிட்டு போய்ட்ட நீ .. இங்கன கெடந்து
மூச்சு முட்டுது எனக்கு..

என்னக்கா சொல்ற..

ஆமாண்டி.. அன்ன்னிக்கு நீ சும்மா இல்லாம அசை போடறதை பத்தி சொல்லிட்டு போய்ட்டே
அன்னில இருந்து எந்தப் பாட்டைக் கேட்டாலும் அசை போடறதே வேலையா போச்சுடி.. இப்ப கூட பாரு

காதல் யானை வருகிற ரெமோ
நேர்நேர் தேமா நேர்நேர் தேமா நிரைநிரை கருவிளம் நேர்நேர் தேமா ன்னுட்டு இருக்கேன்.. என் பையன் ஒரு மாதிரியா
பாக்கறாண்டி என்ன

அது சரிக்கா அதென்ன கைல பழைய புத்தகமாட்டு இருக்கு ?

மாதிரியென்ன அதே தான்.. பத்தாப்பு படிக்கறப்ப என்னோட இலக்கண புத்தகம் இதான்.. பழைய குப்பைய
கெளாரினதுல இது கெடச்சது

அதென்னக்கா குப்பைன்னுட்ட... இதெல்லாம் மாணிக்கமில்லையா.. பாருங்க அதுல யாப்பு பத்தி கூட
போட்டிருப்பான் வெண்பா எப்படி எழுதறதுன்னுல்லாம் கூட போட்டுருப்பான் பாரேன்

ஆமா படிச்சேன்.. அதென்னமோ மாமுன் நேர் வரக்கூடாதாம்.. விளம்முன் நிரை வரக்கூடாதாம்
காய் முன் நிரை வரக்கூடாதான். சில இடத்துல நேரு வரலாம் காந்தி வரக்கூடாதும்பிங்களா ? அதென்னடிம்மா ஒன்னுமே புரியல எனக்கு

அதான்கா வெண்பா வோட பொது இலக்கணத்துல மொத பாடமே!! ஒரு உதாரணம் சொல்றேன் கேளு

மரகதப் பட்டுடுத்தி மங்கைநான் பாடும்
விரகத்தின் வாது விளம்பேன் - சரசம்
மறந்தவர் பெற்றார் மடிக்கணினிப் பிள்ளை
கரம்பிடித்த என்கணவர் காண்.

அப்படின்னு ஒரு வெண்பா எடுத்துப்போம்

இரு இரு என்ன உங்க வீட்டுக் காரருக்கும் உனக்கும் எதாச்சும் லடாயா ?

இப்ப நான் வெண்பா பத்தி சொல்லவா வீட்டுக் காரர் பத்தி சொல்லவா ?

அம்மா தாயே வீட்டுக் காரர் புராணம் அப்புறம் இப்ப வெண்பா புராணத்துக்கு வரலாம்

அப்படி வாக்கா.. இப்ப

மர/கதப்/ பட்/டுடு/த்தி மங்/கைநான்/ பாடும்
கருவிளம் கூவிளங்காய் கூவிளம் தேமா

மொதச்சீர் விளச்சீரா அதுக்கு அடுத்து நிரை வ்ரக்கூடாது.. நேர்ல தான் தொடங்கனும்

அடுத்தென்ன காய்ச்சீரில்லையா அதனால காய்ச்சீருக்கு அடுத்து நேர்ல தான் வரனும்

கடைசீ சீர் என்ன ?? மாச்சீர் அதுக்கடுத்து நிரைல தான ஆரம்பிக்கனும் ..

அதான் விர/கத்/தின் கருவிளங்காய் னு ஆரம்பமாயிருக்கு

அதென்னடிம்மா முன் முன் அப்படின்னுட்டு பின்னாடி போட்டிருக்கீங்க கன்பூஷனாகீதுடி

சுருக்கமா சொல்லேண்டி

அது அப்படி தான் .. கேட்டுக்கோ

வரக்கூடாதவை

மாமுன் நேர்
விளம் முன் நிரை
காய்முன் விளம்

வரலாம் என்பவை

மாமுன் நிரை
காய் முன் நேர்
விளம் முன் நேர்

அவ்வள தான்கா .. சரி அதெல்லாம் இருக்கட்டுங்கா மொதல்ல எத்தனை அடி எழுதனும்னு சொல்லிருக்காங்களான்னு பாரு

அவன் புத்தகத்துல சொல்றது இருக்கட்டும் இப்ப வெண்பா பத்தி நீ சொல்லல உனக்கு இருக்குடி அடி ..

அய்ய்யோ அக்கா ... ரெண்டு அடில இருந்து மொத்தம் பன்னெண்டு அடி வரைக்கும் எழுதலாமாம்.

அப்புறம் ?

ரெண்டடி எழுதுனா அது பேரு குறள் வெண்பாவாம், மூனடில எழுதுனா

நாஞ்சொல்றேன்.. அது வாமன வெண்பா தானே

வாமன வெண்பாவா என்ன சொல்ற நீ .. மூணடி இருக்கறதெல்லாம் வாமனரா ? அது சிந்தியல் வெண்பா

சரி சரி மேல சொல்லு... சிந்தியல்னு சொல்லிட்டே மூக்க சிந்தி செவுத்துல தொடைக்காதே

அடுத்தது நாலடில வரும்..

ஓ அதான் நாலடியாரா ?

ஆமா.. நாலடியார்.. அண்ணாமலையார்.. நாஞ்சிலார்..

ஆமாண்டி.. உனக்கு தெரிஞ்சா பெரிய இது மாதிரி பிகு பண்ணிப்பியே..

சரி சரி சொல்றத கேளு நாலடில அளவியல் வெண்பா ன்னு சொல்லுவாங்க அதுல

நாலுக்கு மேல வந்தா பஃறொடை வெண்பாவாம் அட போக்கா.. வேலை நெறய கெடக்கு இந்த நேரத்துல வெம்பா அம்பா அப்படின்னுட்டு.. இந்த சித்தப்பா
அம்மா பக்கம் சாஞ்சிட்டாராமே??

ஆமா சித்தியும் கூடத்தானே போயிருக்கா.. அது கெடக்கட்டும் இந்த மாதிரி வம்பளக்க நேரம் இருக்கும்
வெம்பா சொல்ல தெரியாதா ??

இன்னும் எதுகை மோனைன்னு இருக்குக்கா அது தெரிஞ்சுட்டா வெண்பா எழுதுறது பாதி கத்துட்ட மாதிரி தான்

சரி இப்ப சொன்னத வச்சி ஒரு வெண்பா சொல்லட்டா

சொல்லுக்கா

வெளிச்சத்தை தின்றுநிதம் இக்கொடிகள் ஜோராய்
களிப்பாய் படைக்குது பச்சை - சிலிர்ப்பாய்
நினைக்கையில் நெஞ்சம் நிறைய இறையை
நினைத்தே நெகிழ்ந்திருந்தேன் நான்

யம்மாடி... கோடு போட்டா ரோடு போடறா ஆளுக்கா நீ உன் பையனுக்கென்ன சயின்ஸ் பாடம் சொல்லிக் குடுத்தியா என்ன ?

இருடி.. சரியா வருதான்னு பிரிச்சு பாத்துடலாம்

வெளிச்/சத்/தை தின்/றுநி/தம் இக்/கொடி/கள் ஜோ/ராய்
கருவிளங்காய் கூவிளங்காய் கூவிளங்காய் தேமா
நிரை/நிரை/நேர் நேர்/நிரை/நேர் நேர்/நிரை/நேர் நேர்/நேர்

ஆக இரண்டாவது சீர் காய்ச்சீர் அதுக்கு முன்னாடி வரசீர்ல இறுதி அசை நேர்ல இருக்கு சரியா
அதேபோல மூனாஞ்சீரும் காச்சீர் அதுக்கு முன்னாடி நேர் வரலாம்.. நாலாஞ்சீர் மாச்சீர் அதுக்கு முன்னாடி வரது காய்ச்சீர் அப்போ இது சரி தானே

அப்படியே மிச்சத்தை நீ பிரிச்சு சரியான்னு சொல்லு என்ன

களிப்/பாய் படைக்/குதே பச்/சை - சிலிர்ப்/பாய்
நினைக்/கையில் நெஞ்/சம் நிறை/ய இறை/யை
நினை/த்தே நெகிழ்ந்/திருந்/தேன் நான்

சரிதான்க்கா... ஆனா எதுகை மோனை தான் கொஞ்சம் இடிக்குது

அப்ப கொஞ்சம் ஒதுங்கி நிக்கறது ?

போக்கா எப்பவுமே உனக்கு கேலி தான்.. எங்கவீட்டுக்காரர் வரநேரம் .. நான் வரேன்கா..

சரிடி நாளைக்கு வந்து எதுகை மோனை சொல்லித் தரியா??

சரிக்கா

அந்த மடிக்கணினியை உடைக்காதடீ பாவம் எவ்வளவு காசோ... பாரு சொல்ல சொல்ல ஓடிட்டே இருக்கா

****************

9: சிந்தனை செய்தால் சிறப்பு (வெ.வ.வா)

2006-04-13T08:50:00.000+05:30

இந்த வெண்பா வடிக்கலாம் வா தொடர், உங்க எல்லாருடைய ஆர்வத்தினால் நல்லா வரவேற்பை பெற்று வந்து கொண்டிருக்கிறது. இந்த ஆர்வத்தைப் பார்த்து விஷயம் தெரிஞ்சவங்க வந்து சில அறிவுரைகள் தந்திருக்காங்க. அதென்ன அறிவுரை, அதனால என்ன பயன் என்று கொஞ்சம் பார்ப்போம். அதுக்குத்தான் இந்த பதிவு. முதல்ல என்ன சொன்னாங்கன்னு பார்ப்போம்.

ராகவண்ணா என்ன சொன்னாருன்னா ஒரு வெண்பாவை எடுத்து நல்லா 4-5 முறை பாலிஷ் போட்டு பர்ஃபெக்ட்டா ஆக்கணுமாம். அப்புறம்தான் அடுத்த வெண்பாவிற்குப் போகணுமாம். அதுவும் ரெண்டு, மூணு பேர் வேணும்னா கூட சேர்ந்து ஒரு பாவை இந்த மாதிரி ரெடி பண்ணணுமமாம். இந்த மாதிரி பழக பழக சரியான வார்த்தைப் பிரயோகம் வருமாம். சரி. அடுத்ததா நம்ம வெண்பா டீச்சர் ஜீவ்ஸ் வந்து அவர் பங்குக்கு வார்த்தைகளை ரொம்ப உடைக்காம போடப் பாருங்க. அது இன்னும் மெருகூட்டும்ன்னு சொல்லிட்டுப் போயிட்டாரு. இப்போதைக்கு இது இரண்டு மட்டும் போதும்.

நம்ம ஜெயஸ்ரீ இருக்காங்களே, அவங்களுக்கும் இந்த விதி எல்லாம் பிடிச்சுப் போச்சு போல. அதனால நம்ம 'குன்றில் குமரனைக் காண்' பதிவுல ஒரு வெண்பா எழுதி மெருகேத்திக்கிட்டே இருந்தாங்க. அவங்களுக்கு உதவியா நானும் எனக்கு தெரிஞ்சதைச் சொன்னேன். சரி. இந்த விதிகளை எல்லாம் கடைபிடிச்சதுனால என்ன ஆச்சுன்னு கேக்கறீங்கதானே. அதையும் பார்ப்போம்.

நான் போட்ட ஈற்றடியில் மோனை சரியில்லை என்று இராம.கி. ஐயா அவர்கள் அதை மாற்றி, மோனையைச் சரிசெய்து, ஓசையைக் கூட்டி, 'குன்றில் குமரனையே கொள்' என்ற ஈற்றடியைத் தந்தது உங்களில் பலபேருக்கு தெரியும். ஜெயஸ்ரீ, இந்த ஈற்றடியை எடுத்துக்கிட்டு

குன்றம்கு டைபிடித்த மாயவன் தன்மருகன்
குன்றுருவ வேலெறிந்து சூரனையே - அன்று
வென்றுசி னந்தணியவே யிருந்த தணிகைக்
குன்றில் குமரனையே கொள்

என்று ஒரு வெண்பா தந்தாங்க. எப்பவும் போல இருந்தா இதை பதிவில் போட்டு விட்டு, ரொம்ப நல்லாயிருக்கு. நன்றின்னு ஒரு பின்னூட்டம் போட்டுட்டு அடுத்து யாருடா வெண்பா போடுவாங்கன்னு பக்கத்தை ரிஃப்ரெஷ் பண்ணிக்கிட்டு இருந்திருப்பேன். இந்த முறை அதைச் செய்யாமல் //னந்/தணி/யவே// இது கனிச்சீர் எனச் சொல்லி, அதனால வெண்பாவைக் கொஞ்சம் மாற்றி

குன்றம்கு டைபிடித்த மாயவன் தன்மருகன்
குன்றுருவ வேலெறிந்து சூர பதுமனையே
வென்றுசி னந்தணிய நின்ற தணிகைக்
குன்றில் குமரனையே கொள்

எனச் சொல்லி சரியா இருக்கான்னு பார்க்கச் சொன்னேன். இப்போதான் ஜிரா வந்து மிலிட்டரி ஆபிஸர் மாதிரி 'நல்லா பாலிஷ் போடணும், வெண்பாவை பார்த்தா முகம் பளிச்சுன்னு தெரியணும்' அப்படி இப்படின்னு சொன்னார். அதே சமயம், நம்ம ஜீவா (அட ஜிராவும், ஜீவாவும்ன்னு டைட்டில் வெச்சு இருக்கலாம் போல இருக்கே. வேண்டாம் யாராவது அவசரத்தில் ரெண்டுத்தையும் சேர்த்து ஜீரோ, ஜீரான்னு எதாவது படிச்சு வைக்கப் போறாங்க.) மோனை பத்தி ஒரு கட்டுரை கொடுத்து படிக்கச் சொன்னார். இது எல்லாம சேர்ந்து நம்மளை ஒரு வழி பண்ணி, வெண்பாவை

குன்றம்கு டைபிடித்த கோபாலன் தன்மருகன்
குன்றுருவ வேலெறிந்து கோர பதுமனையே
வென்றுசி னந்தணிய வந்த தணிகைக்
குன்றில் குமரனையே கொள்.

இப்படி மாத்தியாச்சு. இதுல மோனை சரியா இருக்குன்னு நினைச்சேன். (வெ என ஆரம்பிக்கும் சீருக்கு வ என ஆரம்பிக்கும் சீர் மோனையில்லை என பின்பு தெரிய வந்தது.) பின்னர் ஜீவா அவர் பங்குக்கு பூக்களைத்தான் பறிக்காதீங்க ஸ்டைலில் 'வார்த்தைகளை உடைக்காதீங்க, சீர் தவறாப் பிரிக்காதீங்க'ன்னு பாடவும், மீண்டும் ஒரு iteration. வெண்பா இப்போ இப்படி ஆனது.

குன்றைக் குடைசெய்த கோபாலன் தன்மருகன்
குன்றுருவ வேலெறிந்து கோர பதுமனையே
வென்ற சினந்தணிய வந்த தணிகைக்
குன்றில் குமரனையே கொள்.

ஜெயஸ்ரீயும் இந்த வெண்பாவை விடப் போவதில்லை என முடிவு கட்டி

குன்றம் குடைசெய்த கோபாலன் தன்மருகன்
குன்றுருவ வேலெறிந்து கோர பதுமனையே
வென்ற சினமாற வந்தமர் தீந்தணிகைக்
குன்றில் குமரனையே கொள்

என மாற்றிக் கொடுத்தார்கள். இப்போதான் மூன்றாம் அடியில் மோனை சரியில்லை என வர வெண்பா இப்படிப் போனது.

குன்றம் குடைசெய்த கோபாலன் தன்மருகன்
குன்றுருவ வேலெறிந்து கோர பதுமனையே
வென்ற சினமாற மேவிய தீந்தணிகைக்
குன்றில் குமரனையே கொள்

பதிவிலிட்ட சற்று நேரத்திலேயே மீண்டும் இப்படி மாறியது.

குன்றம் குடைசெய்த கோபாலன் தன்மருகன்
குன்றுருவ வேலெறிந்து கோர பதுமனையே
வென்ற சினமாறி வீற்றிருந்த தீந்தணிகைக்
குன்றில் குமரனையே கொள்

இப்போ முதலில் வந்த வெண்பாவையும், இந்த வடிவத்தையும் மீண்டும் படித்துப் பாருங்கள். எப்படி உரு மாறியிருக்கிறது என்று பார்த்தீர்களா? முதலிலிருந்து இறுதி வரை ஒவ்வொரு அடியிலும் பொருள் மாறவில்லை. ஜெயஸ்ரீயின் வார்த்தைகளில் சொல்வதானால் - 'முருகப்பெருமான் போரெல்லாம் முடித்து தணிகையில் வந்து அமர்ந்து தன் கோபமும், களைப்பும் தணியப்பெற்றான். ' விஷயம் இதுதான். ஆனால் அப்பொருளை கொண்டுவரும் வார்த்தைகளின் பொலிவு கூடித்தானே இருக்கிறது?

அதனால் இனி வரும் வெ.வ.வா தொடர்களில் இதைப்போல ஒரு வெண்பாவை எடுத்துக் கொண்டு அதனை ஒரு வழி செய்துவிட்டு அதற்குப் பின் அடுத்த வெண்பாவுக்குச் செல்லலாம் என்று ஒரு யோசனை. வரும் வெண்பாக்களை பதிவில் இட்டுக்கொண்டு ஒவ்வொன்றாய் எடுத்து மெருகேற்றிப் பார்க்கலாம். என்ன சொல்கிறீர்கள்? அப்படியே செய்வோமா?

சரி இப்போ 'சிந்தனை செய்தால் சிறப்பு'ன்னு ஒரு புது ஈற்றடியும் அதற்கேற்ற வெண்பாவும். இதை எப்படி மாற்றலாம். சொல்லுங்களேன்.

சாதி மொழிச்சமய சண்டைகள் வேண்டாமே
பாதிப்பும் வேண்டாம் பதிவினிலே - சோதிக்கும்
நிந்தனை எண்ணங்கள் நெஞ்சிலின்றி வெண்பாவாய்
சிந்தனை செய்தால் சிறப்பு

பி.கு. : என்னை அவரின் பக்கத்தில் பதிவு போடச்சொல்லி அன்புடன் அழைத்தமைக்கு ஜீவாவிற்கு நன்றி.

8 : நெருப்பிலே பூத்த மலர்

2006-04-07T17:10:00.000+05:30

இன்றைய ஈற்றடி :

நெருப்பிலே பூத்த மலர்

பொறுப்பிலா இவ்வையத்தின் பொய்யுரை நீக்க
நெருப்பினில் நீயிறங்கு சீதையே என்றே
கருத்தில் உறையும் கணவன் பகல
செருக்கிலா சீதையும் நெருப்பினின்று வந்தாள்
நெருப்பிலே பூத்த மலர்

அன்புடன்
ஜீவா

சர்வம் கிருஷ்ணார்ப் பனம்

2006-04-06T08:19:00.000+05:30

போற்றுவார் போற்றலும் - புழுதி வாரி
தூற்றுவார் தூற்றலும் போகட்டும் கண்ணனுக்கே

கண்ணனே காட்டினான்
கண்ணனே சாட்சி நான்
கண்ணனே கொலை செய்கின்றான்.

*****

மனநலம் குன்றிய ஒரு மனிதனின் கையில் இணையம் என்கிற சக்தி கிடைக்கும்போது அது எப்படி எல்லாம் பயன்படுத்தப் படும் என்பதற்கு போலி டோண்டு என்ற பெயரில் வந்து பின்னூட்டம் இட்டுச் செல்லும் அந்த மனநோயாளியின் செய்கை உணர்த்துகிறது.

மற்றவர்கள் மேல் சாணம் தெளிப்பதாக எண்ணிக் கொண்டு ஒரு சாணக்குவியலில் குளித்துக் கொண்டிருக்கிறார்.

கருவாடு விற்கும் பெண்மனி ஒரு நாள் வீடு திரும்ப நேரமானதால் பூக்கடை அருகே தூங்க வேண்டியதாகிற்று. பூவின் வாசம் ஏற்காம. அவள் அலுத்துக் கொண்டு சொன்னாள்.. என்ன துர்நாற்றம் இதென்று. அவளால் உறங்க இயலவில்லை. கடைசியில் தன்னிடம் இருந்த கருவாட்டுக் கூடையை முகத்தின் மேல் கவிழ்த்துக் கொண்டு அந்த வாசத்தில் உறங்கிப் போனாளாம்.

இந்த நபரும் அவ்வாறே!!. பூக்களின் வாசனையை இவர் ஏற்க மறுக்கிறார். இதற்கும் பல அர்ச்சனைப் பூக்கள் வரலாம். அது கண்டு நான் அஞ்சப் போவதில்லை.

எத்தனை தூரம் ஓடமுடியும் போலி நண்பரே ?? ஓடுங்கள் ஓடிக் கொண்டே இருங்கள்.. ஒரு நாள் நீங்கள் திரும்பிப் பார்க்கும் நேரம் ... திரும்ப இயலாத அளவிற்கு இயல்பற்ற நிலைக்கு சென்றுவிட்டிருப்பீர்கள். அதை உணர்ந்து கொள்ளுங்கள். உங்கள் மனைவி மக்களுக்கு செலவிடும் நேரத்தை விட இது போன்ற இழிச்செயல்களில் அதிகம் செலவிடுகிறீர்களோ என்று தோன்றுகிறது.

மாறுங்கள் நண்பரே... சாக்கடையில் இருந்து வெளியே வாருங்கள். மணம் கொண்ட உலகம் உங்களை வரவேற்க காத்திருக்கிறது.

என்னை மறுபடியும் தூற்றினாலும் நான் கவலைப் படப்போவதில்லை நண்பரே... முதல் வரியை மறுபடி படித்துப் பாருங்கள்...

அன்புடன்
ஜீவா

7 : வலைக்குள்ளே சிக்கிய மான்

2006-04-05T10:53:00.000+05:30

இன்னையோட ஈற்றடி

வலைக்குள்ளே சிக்கிய மான்

ஏதோ எழுதிருக்கேன்.. அதுக்கு விளக்கம் கேக்க மாட்டீங்க அப்படிங்கற நம்பிக்கை தான் வேறென்ன

சிலைக்குள்ளே சிற்பிவைத்த சிங்காரம் காணா
மலைக்குள்ளே மாட்டிய மானிடன் போலே
தலைக்குள்ளே றிடாமல் தவிதவிக்கும் நானோ
வலைக்குள்ளே சிக்கிய மான்

வலை இனைய தளம் எனவும் கொண்டால் பல நல்ல வெண்பா எழுதலாம். முயற்சி செய்யுங்க மக்களே

அன்புடன்
ஜீவா

பி.கு : தளைத்தட்டளை சுட்டிக் காட்டிய இராம.கி ஐயாவுக்கு நன்றிகள் பல

6: எழுதவே ஈற்றடித் தா

2006-03-31T11:01:00.000+05:30

இன்னைக்கு ஈற்றடி இதான் :D

பழுதிலா வெண்பாதான் வேண்டுமெனில் நண்பா
எழுதவே ஈற்றடித் தா

வாங்க வாங்க...

அன்புடன்
ஜீவா

பகுதி 5 : காலமே மாறிடிச்சுப் போ ( வெ.வ.வா தொடர் )

2006-03-29T23:42:00.001+05:30

தொலைக்காட்சி முன் உட்கார்ந்து தன் நேரத்தையும் ஆற்றலையும் செலவழிக்கும் பெண்களுக்காக..

அலுவலக பணி முதற்கொண்டு சிற்றாள் வேலை செய்யும் பெண்கள் பெரும்பாலானோர் பணி முடிந்து வீட்டுக்கு வந்தாலும் ஓய்வெடுக்ககமல் அந்த தொடர்களப் பார்க்க வில்லையென்றால் என்னமோ இழந்த மாதிரி இருப்பார்கள்.. அது போன்ற பெண்களுக்காக .. :(

தொலைக்காட்சி தொடர்களில் இருந்து நம் தமிழகம் எப்போது விடுதலைப் பெறும் ?.

வேலையோ வேலையின்னு வேர்வையோடு உழைச்சாலும்
மாலைநேரம் பெண்கள்தாம் மற்றிருக்கும் வேலைவிட்டு
கோலங்கள் பார்த்திந்த ஞாலம் மறந்ததினால்
காலமே மாறிடிச்சுப் போ

அன்புடன்
ஜீவா

பி.கு : தளைத்தட்டியதை சுட்டிக் காட்டிய இலவசக் கொத்தனார்க்கு நன்றி

பகுதி 4 : அரங்கனே நின்தாள் சரண் ( வெண்பா வடிக்கலம் வா தொடர் )

2006-03-21T22:30:00.000+05:30

முந்தைய பதிவு எப்படியோ காணாமல் போனதால் அந்த ஈற்றடி விட்டு வேறு ஈற்றடியில் துவங்கலாம்.

இன்றைய ஈற்றடி "அரங்கனே நின்தாள் சரண்"

நித்தம் ஒருபூசை செய்தேவென் மெய்பொருள்
மொத்தம் உனக்கென்றே அர்பணித்தேன் - சித்தம்
இரங்காதா தென்திசை ஆள்கின்ற தேவன்
அரங்கனே நின்தாள் சரண்

அன்புடன்
ஜீவா

whats happening ?? :((

2006-03-20T23:34:00.000+05:30

2 days back i wrote " thanthalaiyil thane neruppu " part 4 of veNbaa vadikkalam vaa. some unknown reason it got erased from my blog. again tried today. i am facing the similar issue. i couldnt see that post in the listing. did similar thing happened to any of you ?? if so can you please help me to recover the previous post ?

thanks
Jeeva

பகுதி 3 : சூடான நெய்யப்பம் தா ( வெண்பா வடிக்கலாம் வா - தொடர் )

2006-03-17T22:01:00.000+05:30

பகுதி 3 : சூடான நெய்யப்பம் தா ( வெண்பா வடிக்கலாம் வா - தொடர் )
******
சரசுவும் கமலாவும் பக்கத்து பக்கத்து வீட்டுக்காரர்கள். அவர்களின் உரையாடலை கேளுங்கள்
___________________________________________________-

ஏண்டிம்மா சரசு.. உங்க வீட்டுக்காரர் காலைல இருந்து என்னமோ சீர் சீர்னு சொல்லிட்டு இருக்காரே? கல்யாணம் ஆகித்தான் பத்து வருஷம் ஆச்சே இன்னுமென்ன சீர் பத்தி பேச்சு?

அட நீ வேற கமலாக்கா... அவரு சொல்ற சீர் வேற.. அது தமிழ்ல யாப்பு இலக்கணத்துல வரதாம்.

யாப்பா ??? நான் காப்பு கட்றதை பத்து கேட்டிருக்கேன். அதென்னடிம்மா யாப்பு.

அதுவாக்கா.. யாப்புன்னா பாட்டை எப்படி எழுதனுங்கற விதி. வெண்பா, ஆசிரியப்பா கலிப்பா வஞ்சிப்பா அப்படின்னு என்னன்னவோ சொன்னார்.

ஓஹோ.. கொஞ்சம் கொஞ்சம் ஞாபகம் வருதுடி, எங்க வீட்டுக்காரரும் இருக்காரே தமிழ்னு சொல்ல சொன்னா " தமில்" ங்கறார், குழம்புன்னு சொல்லுங்கன்னு சொன்னா "கொளம்பு" ங்கறார் அவர் கிட்ட போய் இதெல்லாம் எப்படிடிம்மா நான் கத்துக்க முடியும்.. அது கெடக்கட்டும் அதென்னமோ சீர் சீர்னு சொன்னியே அதைக் கொஞ்சம் எனக்கும் தான் சொல்லேன்.. ஹ்ம்ம்.. பத்தாவது படிக்கறச்ச நேர் நேர், நிரை நிரைன்னு படிச்சது மட்டும் தான் இலக்கணத்துல இருந்து நினைவுக்கு வருது. சீர் பத்தியும் லேச ஞாபகத்துக்கு வர்ர மாதிரி இருக்கு. பதினைஞ்சு வருஷம் ஆச்சா மறந்தே போச்சுடி...

சரிக்கா சொல்றேன் கேட்டுக்க... ரெண்டு அசைக்கு மேல வந்தா அது சீர்னு சொல்லுவாங்க. அதாவது.... நேர் + நேர், நிரை + நிரை, நேர் + நிரை இல்லாட்டி நிரை + நேர் இப்படி வரும் என்ன வேறெங்கையோ பாக்கிறியேக்கா சொல்றது புரியுதா?

உடனே வாத்தியார் மாதிரி அதிகாரம் பண்ணாம சொல்லுடி.. நேர் + நேர் அப்படின்ன என்னமோ ஹேமான்னு வருமே

அய்யோ அக்கா அது ஹேமா இல்லை " தேமா ".. தே+ மா அதாவது நேர் + நேர்

அம்மாடி சரசு.. ஹேமா வும் நேர் + நேர் ல தானடியம்மா முடியுது.

அதென்னமோக்கா அவர் சொன்னத சொல்றேன் இப்படி எடக்கு முடக்கா கேட்ட நான் போறேன் .. அடுப்படில ஆயிரம் வேலையிருக்கு

கோச்சுக்காதடீ.. தெரியாம தானெ கேக்கறேன்.. அதுக்கு ஒரேடியா பிகு பண்ணிக்கறியே

அதாவது அக்கா நேர்+நேர் வந்தா அது தேமா அதாவது மாச்சீராம்.

ஆங் இப்ப ஞாபகம் வருதுடி.. நேர் நேர் தேமா, நிரை நேர் புளிமா நிரை நிரை கருவிளம் நேர் நிரை கூவாகம்

சொதப்பிட்டியேக்கா.. மொத மூணும் சரியா சொல்லிட்டு கடைசி சீரை மட்டும் கூவாகம்னுட்டியே.. அது கூவாகம் இல்லைக்கா கூவிளம்.. அதெப்படின்னு சொல்றேன் கேட்டுக்க.

அதாவது இந்த தேமாவை பிரிச்சா தே + மா = நேர் + நேர் .. அது மாதிரி எல்லாத்தையும் பிரிச்சா சரியா வரும் . எங்க சொல்லுக்கா பாக்கலாம்

இதென்னடிம்மா பிரமாதம்.. நிறை நேர் = புளி + மா, கருவிளம்னா கரு+விளம் அதாவது நிரை + நிரை. அதே போல தானே கூவிளம் கூ + விளம் = நேர் + நிரை . என்ன சரியா சொல்லிட்டேனா ?

அய்யோ கமலாக்கான்னா கமலாக்கா தான் .. கற்பூர புத்தி.. சட்டுன்னு புடிச்சிட்டியேக்கா.. அந்த காய்கறிகாரன் கிட்ட காய் வாங்கும்போது நான் கூட திணறுவேன் கணக்கு போட்டு பணம் குடுக்க .. நீ மட்டும் சட்டுன்னு ரெண்டே நிமிஷத்துல கணக்கு போட்டு சொல்லிடறியே .. பிரமாதம் போ..

அது சரி இப்படி சொல்லி சொல்லியே கவுத்துடுவிங்களே.. அடுத்து என்ன சொல்லு

அடுத்து காய்ச்சீருக்கா

நீ சீர் வரிசை சொல்லு அதை கரெக்ட்டா அசை பிரிச்சு சொல்றேனான்னு பாரு

சரிக்கா.. தேமாங்காய், புளிமாங்காய், கூவிளங்காய், கருவிளங்காய்

சரி கேட்டுக்க.. நேர் + நேர் + நேர் = தே+மாங் + காய் , நிரை+நேர்+நேர் = புளி+ மாங்+காய், நேர்+நிரை+நேர் = கூ+விளங்+காய், அப்புறம் வந்து நிரை+நிரை+நேர் = கரு+விளங்+காய். என்ன சரியா சொல்லிட்டேனா

கமலாக்கா.. உன் காலக் கொஞ்சம் காட்டு... தடால்னு விழுந்துடறேன்.. என்னமா பின்றக்கா

சரி அதிருக்கட்டும் காய்ச்சீர் வந்தா கனிச்சீரும் வந்தே வரணுமே...

ஆமாக்கா தேமாங்கனி, புளிமாங்கனி, கூவிளங்கனி அப்புறம் கருவிளங்கனி
ஹ்ம்ம் இதுக்கும் சொல்லட்டா... நேர்+நேர்+நிரை = தே+ மாங்+கனி, அப்புறம் வந்து நிரை+நேர்+நிரை =புளிமாங்கனி, நேர்+நிரை+நிரை வந்து கூவிளங்கனி அப்புறம் கடேசியா நிரை+நிரை+நிரை = கருவிளங்கனி. என்ன சரியா ..மறுபடி அசத்திட்டேனா

அக்கா... நீ எங்கையோ போய்ட்டக்கா..

எங்கயும் போலடியம்மா இங்க தான் இருக்கேன்.. காய் கனி ஆச்சு பூச்சீர் லாம் இல்லையா..

இருக்கு அக்கா.. அதெல்லாம் வெண்பாக்கு வேண்டாமாம் அதனால அப்புறம் கத்துத்தரேன்னுட்டார்

அட வெண்பால்லாம் எழுதுறியா என்ன நீ

இப்ப இப்ப தான்க்கா எழுத ஆரம்பிச்சிருக்கேன்.

அப்படி போடு, "சூடான நெய்யப்பம் தா" .. இதை வச்சு ஒரு வெண்பா எழுதேன் பாப்போம்..

அட போக்கா அதை எழுதறது என்ன கஸ்டமா.. இரு இதோ வரேன்.. உங்க வீட்டுக்காரர் பத்தி சொல்றேன் கேட்டுக்கக்கா.

மனித நெரிசலில் நாள்தோரும் சிக்கி
கணிப்பொறி வேலையில் சேர்ந்தே - பணியில்
மாடாய் உழைத்து மனைசேரும் அன்பர்க்கு
சூடான நெய்யப்பம் தா

இப்ப நீதாண்டி அசத்திட்டே... சூப்பர். இதப்படிக்கறவங்க எல்லாரும் சூடான நெய்யப்பம் தா ன்னு கவிதை எழுத போறாங்க பாரேன்.. அது கிடக்கட்டும் எனக்கு எப்ப வெண்பா பத்தி சொல்லித்தரப் போற..

கொஞ்சம் இருக்கா.. அடுப்புல பால் வச்சுட்டு வந்தேன்.. பால் குக்கர் சத்தம் போடுதே அதுக்கு பதில் சொல்லிட்டு வந்து உனக்கு பதில் சொல்றேன்.
*****

சரசு வந்து கமலாக்காவுக்கு வெண்பா பத்தி சொல்லிக்குடுக்கறதுக்குள்ள நாம "சூடான நெய்யப்பம் தா" அப்படிங்கற ஈற்றடி வச்சி வெண்பா எழுதலாமே.. வாங்க எல்லோரும் எழுதலாம்

அன்புடன்
ஜீவா

பகுதி 2 - வெண்பா வடிக்கலாம் வா!!

2006-03-14T10:11:00.000+05:30

பகுதி 2 - வெண்பா வடிக்கலாம் வா!!
****************

பாலும் தெளிதேனும் பாகும் பருப்புமிவை
நாலும் கலந்துனக்கு நான் தருவேன் - கோலம்செய்
துங்கக் கரிமுகத்துத் தூமணியே நீயெனக்குச்
சங்கதமிழ் மூன்றும் தா.

----ஔவையார்

ம்ரபுக் கவிதையில் நான்குவகை பாக்கள் உண்டு.

வெண்பா, ஆசிரியப்பா, கலிப்பா மற்றும் வஞ்சிப்பா

வெண்பா மட்டுமே (ஓரளவுக்கு ) எனக்கு தெரியும். அதனாலே அதிகப்படியானே கேள்விகள் கேட்டா அப்புறம் திருவிளையாட; நாகேஸ் கணக்கா... " எனக்கு கேட்க மட்டும் தான் தெரியும் " அப்படின்னு பதில் வந்தாலும் வரலாம் :P ( நம்ம கோ. ராகவன் , குமரன் அண்ணாச்சி மாதிரி ஆளுங்க இருக்கச்ச நமக்கென்ன கவலை. எங்கயாச்சும் தப்பு கண்டா வந்து சொல்லித் தரப் போறாங்க )

முதலில் அசை மற்றும் சீர் பிரிக்க கற்றுக் கொள்வோம். ( மாடு அசைப் போடும்போது கவனிச்சிங்கன்னா அத்தோட வாயசைவு ஒரே சீரான வேகத்துல இருக்கும். )

நம்ம கைப்பு " வந்துட்டான்யா வந்துட்டான்யா சொல்றது உங்க காதுக்கு கேக்கலையா.. பாருங்க எப்படி சொல்லிட்டார்னு " ( கைப்பு சும்மா தான்.. லுல்லுவாங்காட்டிக்கி.. நான் உங்க சங்கத்தில சேர என்ன தகுதி வேணும் ?? அப்படியே சேத்துக்கங்களேன் )

சரி சரி மேட்டருக்கு வருவோம். நேரசைன்னா என்னான்னு பாக்கறதுக்கும் மின்னாடி ( தக தக தக தங்க வேட்டையோட பாதிப்பு தேன் வேறென்ன ) ஒரு சின்ன பொது விதி

பொது விதி : எங்கெங்கு மெய்யெழுத்து வருகிறதோ அங்கே ஒரு வெட்டு வெட்டி ( தீவிரவாதம் பயிலாதீர் :)) ) அசை பிரியுங்கள். இரண்டெழுத்துகள் தொடரும்போது .. இரண்டுக்கு மேல் எப்போதும் வேண்டாம் என்ற கொள்கையை பயிலுங்கள்.

அப்புறம் நேரிசைன்னா என்னா

நேரசைக்கான இலக்கணம் = நெடிலெழுத்து(தொடரும் மெய்யெழுத்து), ஒரு குறில்(தொடர்ந்த மெய்யெழுத்து)
இந்த நேர் அப்படிங்கற வார்த்தையே எடுத்துக்குங்க. ஒரு நெடிலெழுத்து வந்தா அது தனித்த அசையாய் நிற்கும் அது குறிலெழுத்துக்கு அப்புறம் வராமல் இருந்தால்.

நிரையசைக்கான இலக்கணம் = இரு குறிலெழுத்து, இரு குறிலெழுத்து தொடர்ந்த மெய்யெழுத்து, ஒரு குறிலெழுத்து தொடர்ந்த நெடிலெழுத்து
.நிரை ங்கற இந்த வார்த்தையை பாருங்க.. ரெண்டு குறில் தொடர்ந்து வந்திருக்கு.

இப்ப ஓரளவுக்கு புரிஞ்சதா ..

சீர் கொண்டு வா.. வெண்மேகமே

மேலுள்ள பாடல் வரியை அசை பிரிக்கலாமா

சீர் = நெடிலெழுத்து தொடரும் மெய்யெழுத்து எனவே இது நேரசை.

கொண்டு = இங்கே பொது விதியை அமல் படுத்த கொண் / டு = நேர் / நேர்

வா = நெடிலெழுத்து = நேர்

வெண்மேகமே = வெண்/மே/கமே = நேர்/நேர்/நிரை ( நெடிலெழுத்து (தொடரும் மெய்யெழுத்து) / நெடிலெழுத்து / ஒரு குறிலெழுத்து தொடர்ந்த நெடிலெழுத்து )

இன்னொரு உதாரணம் பாக்கலாம் ..

அது ஒரு அழகிய நிலாக் காலம்..

அது = இரு குறில் தொடர்ந்து வருவதால் நிரையசை

ஒரு = இரு குறில் தொடர்ந்து வருவதால் நிரையசை

அழகிய = நிரை/நிரை

மேலே உள்ள அவ்வையாரின் பாடலையே அசை பிரிக்கலாம் வாங்க

பாலும் தெளிதேனும் பாகும் பருப்புமிவை

நேர்நேர் நிரைநேர்நேர் நேர்நேர் நிரைநிரைநேர்

நாலும் கலந்துனக்கு நான்தருவேன் - கோலம்செய்

நேர்நேர் நிரைநிரைநேர் நேர்நிரைநேர் - நேர்நேர்நேர்

துங்கக் கரிமுகத்துத் தூமணியே நீயெனக்குச்

நேர்நேர் நிரைநிரைநேர் நேர்நிரைநேர் நேர்நிரைநேர்

சங்கத் தமிழ்மூன்றும் தா.

நேர்நேர் நிரைநேர்நேர் நேர்

இன்னும் கொஞ்சம் வார்த்தைகள் கொண்டு அசை பிரிக்கலாமா ?? ( அசை போடுதல்... சரி சரி அசை பிரித்தல் முடிந்த உடன் நாம் செய்ய வேண்டியது சீர்.. அதுக்காக எவ்வளவு சீர் யார் தராங்க அதை எப்படி சமமா பிரிக்கறதுன்னு யோசிக்கப் படாதுன்னா யோசிக்கப் படாது )

சுட்டும் விழிச் சுடரே சுட்டும் விழிச் சுடரே
என்னிதயம் உன்னைச் சுற்றுதே

கனாக் காணும் காலங்கள் கலைந்தோடும் நேரங்கள்

உன்னையறிந்தால் நீ உன்னையறிந்தால் உலகத்தில் போராடலாம்.

ரை ரைட்ட்ட்ட்ட்ட்

அடுத்து சீர் பிரிக்கறது பாக்கலாம் அடுத்த பதிவில... அதுக்குள்ள அசை பிரிக்கிறது சரியா பண்ணிடலாம்

அன்புடன்
ஜீவா

வெண்பா வடிக்கலாம் வா

2006-03-13T22:14:00.000+05:30

மன்ற மையத்தில் ( பாரம் ஹப்பில் ) இந்த விளையாட்டு ஒரு காலத்தில் கனஜோராக நடந்துக் கொண்டிருந்தது. அதை நாமும் தொடரலாமே ??. ஒருவர் ஈற்றடி கொடுக்க.. அது கொண்டு மற்றவர்கள் வெண்பா வடிக்க வேண்டும். உதாரணத்திற்கு " வெண்பா வடிக்கலாம் வா " என்பது ஒரு ஈற்றடி. ஆர்வமுள்ளோர் இதைத் தொடரலாம். இலக்கணம் தெரியவில்லை என்று கவலைப் படாதீர்கள்.. எழுதுங்கள். வெண்பா இலக்கணம் தவறென்றால் ஆங்காங்கே சொல்லித்தர நம்மிடத்தில் சான்றோர்களுக்கு பஞ்சமா என்ன ??

நான் ஆரம்பித்து வைக்கட்டுமா ?? இன்றைய ஈற்றடி

வெண்பா வடிக்கலாம் வா" இதுவே இருக்கட்டும்...

தினமொருவர் என்றே கணக்கிட்டு நாளும்
மனமிருப்போர் சேர்ந்தால் வலையில் - தினமும்
கண்டிட நற்சுவைப் பாடல் விரைவிலே
வெண்பா வடிக்கலாம் வா !!

அன்புடன்
ஜீவா

குறும்பா!!

2006-03-12T22:05:00.000+05:30

குறும்பா!!
**********

(1)
****
புரியாத எழுத்துகளில்
கலைந்திட்ட செங்கற்களின் நடுவே
பூகம்பக் கையெழுத்து
****

(2)
அதிகாலைப் பொழுது
பூச்சியின் முதுகில் வைரம்.
பனித்துளி

அன்புடன்

ஜீவா

"கண்"டுகொண்டேன் "கண்"டு கொண்டேன் - 2

2006-03-12T00:20:00.000+05:30

இந்த தடவை

சினிமா நட்சத்திரங்களுடன் கூடவே ஒரு அரசியல் பிரபலத்தையும் சேர்த்து இருக்கிறேன் ... கண்டு பிடிங்க

அன்புடன்
ஜீவா

"கண்"டு கொண்டேன் "கண்"டுகொண்டேன்

2006-03-11T18:33:00.000+05:30

கண்கள் எங்கே நெஞ்சமும் அங்கே..

மேலே காணும் இரு கண்கள் யாருடையவை என்று சொல்லுங்கள் பார்ப்போம் ?? ( திரைப்படம் சார்ந்தவர்கள் ) முதல் தடவைங்கறதால ஈசியா தந்திருக்கேன்... :p

அன்புடன்
ஜீவா

என்ன சொல்லி நாலெழுத ?

2006-03-11T13:26:00.000+05:30

என்ன சொல்லி நாலெழுத
*****
நாலு நாலுன்னு எல்லாரும் போட்டு தாக்கும்போது நாம மட்டும் சும்மா இருப்பானேன்னு இதோ ஆரம்பிச்சுட்டேன்.. அழைத்த குமரன் அண்ணாச்சிக்கு நன்றி.

பிடித்த நான்கு பாடல்கள்:

இது ரொம்ப கஸ்டமான விஷயம்.. நூத்துக்கணக்குல பாடல்கள் இருக்கும்போது அதுல நாலு செலக்ட் பண்றது ரொம்பவே கடினமான விஷயம்.. இருந்தாலும் ரொம்ப ரொம்ப பிடிச்ச நாலு பாடல்கள்

1 - கண்ணே கலைமானே

படம் : மூன்றாம் பிறை
இசை அமைப்பு : இளையராஜா
பாடல் வரிகள் : கண்ணதாசன் (திரைப்படத்திற்கு எழுதிய கடைசீப் பாடல் )
பாடியவர் : K.J.யேசுதாஸ்
---------------------------------------------------
கண்ணே கலைமானே!
கன்னி மயிலெனக் கண்டேன் உனை நானே!
அந்திப் பகல் உன்னை நான் பார்க்கிறேன்.
ஆண்டவனை இதைத்தான் கேட்கிறேன்.
ஆரிராரோ.. ஓராரிரோ..!ஆரிராரோ..! ஓராரிரோ..!

(கண்ணே)

ஊமை என்றால் ஒரு வகை அமைதி...
ஏழை என்றால் அதிலொரு அமைதி..
நீயோ கிளிப்பேடு
பண் பாடும் ஆனந்தக் குயில்பேடு
ஏனோ தெய்வம் சதி செய்தது
பேதை போல விதி செய்தது..

(கண்ணே)

காதல் கொண்டேன் கனவினை வளர்த்தேன்
கண்மணி உனை நான் கருத்தினில் நிறைத்தேன்
உனக்கே உயிரானேன்
எந்நாளும் எனை நீ மறவாதே
நீயில்லாமல் எது நிம்மதி
நீதான் என்றும் என் சந்நிதி

(கண்ணே)

எத்தனை அவசரமான வேலை இருந்தாலும்.. எங்கேனும் இப்பாடல் ஒலித்தால் சற்று நிதானித்து பாடல் முடியும் வரைக் கேட்டு விட்டு செல்வது வழக்கம்.

2 - உன் கண்ணில் நீர்வழிந்தால்..
3 - எங்கிருந்த போதும் உனை மறக்க முடியுமா ( என் அக்காவிற்காக )
4 - மௌனத்தில் விளையாடும் மனசாட்சியே...
4.a - உறவுகள் தொடர்கதை.. உணர்வுகள் சிறுகதை.. (ஹி ஹி.. இது கொசுறு )

அடுத்த பிறவி என்றிருந்தால் அப்போதும் நான்கூடவே இருக்க விரும்பும் தற்போதைய இரத்தசம்பந்தம் தவிர்த்த நான்கு ஆத்மாக்கள்

கீழே குறிப்பிடும் உறவுகள் இணையத்தின் மூலம் உருவாகி இறுகியிருக்கும் பந்தங்கள்

என் அக்கா - சொற்களில் எழுத முடியாத ஒரு பாசப் பினைப்பு.. ( எங்கிருந்த போதும் பாடல் இவருக்காக தான் )

என் தங்கை - உலகின் வெகு தொலைவில் இருந்தாலும் எப்போதும் என்னையும் என் நலனையும் நேசிக்கும் மற்றொரு ஜீவன்

மற்ற இருவர்களை இன்னும் தேடிக் கொண்டிருக்கிறேன்....

மறக்க நினைத்து முடியாமல் இருக்கும் நான்கு விஷயங்கள்.

பணியில்இருந்து திரும்பும் போது விபத்தில் அடிப்பட்டு தன் 35 வயதுக்குள் எங்களை பிரிந்த என் தமயன்.

எட்டாவது படிக்கும் போது தவறு செய்தான் என்று நினைத்து கை வலிக்கும் வரை என் சித்தப்பா மகனை அடித்து பின்பு தவறு அவன் பக்கம் இல்லை என்று தெரிந்தும் என்னைக் காப்பாற்றிக் கொள்ள என் தந்தையிடம் அவன் தவறு செய்ததாக வாதாடியதால் மீண்டும் செய்யாத தவறுக்கு அவன் அடி வாங்கியது.

படிப்பதற்கென்று விடுதியில் தனிமையில் விடப்பட்ட நாள்கள். என்னை நானே மற்றவர்களிடம் இருந்து தனிமைப் படுத்திக் கொண்டு இருந்த காலங்கள்.. இப்போது நினைத்தாலும் வேதனையளிக்கும் காலங்கள் அவை.
காதல் என்று வந்த பெண்ணிடம் முதலில் வயப்பட்டாலும் சில நாட்களுக்கு பின்பு வீட்டு சூழ்நிலை மனதில் கொண்டும் வேறு சில காரணங்களாலும் அதிலிருந்து என்னை நானே விடுவித்துக் கொண்ட தருணத்தில் அவள் கண்ணீர் விட்டு அழுதுகொண்டே பார்த்த பார்வை.

சமீபத்தில் எழுதிய நான்கு குறும்பாக்கள்

கடற்கரையோர மணலில்
காற்தடங்களும் மாறியது
கடலாய்

கள்ளமற்ற வெள்ளைச்சிரிப்பு
கொசுவலையினுள்ளே
குழந்தை

அறையெங்கும் நிலவுத்துண்டுகள்
அள்ளி சேர்க்க ஆளில்லாமல்
ஓட்டை வீடு

இந்தப் பையில் ஒருகோடி
அந்தப் பையில் அம்பது லக்ஷம்
ஒரு சீட்டு பத்துரூபா

பிடித்த கார்ட்டூன் படங்கள்

Finding NEMO
Alice in wonder Land
Alladin
The Lion King

பிடித்த நான்கு புத்தகங்கள்

பொன்னியின் செல்வன்
சிவகாமியின் சபதம்
கடல்புறா
யவன ராணி

போதுமே இதுக்கும் மேல போட்டா எல்லார்கிட்ட இருந்தும் நல்லா நாலு தர்ம அடி விழும்

அடுத்த நாலு பேர் யார்

1 - மதுமிதா
2 - துளசியக்கா
3 - சீமாச்சு
4 -"சாத்தான்"குளத்து வேதம்

அன்புடன்
ஜீவா

குணங்குடி மஸ்தான் சாஹிபு பாடல்கள். -- பராபரக் கண்ணி

2006-03-05T16:37:00.000+05:30

யாமரியேன் பாராபரமே என்று நேற்று ஹரிஹரன் எழுதியது இந்த பராபரக் கண்ணி பற்றி எழுதத் தூண்டியது.

பராபரக் கண்ணி எழுதியவர் குணங்குடி மஸ்தான். மொத்தம் நூறு பாடல்களைக் கொண்டது. இரண்டு இரண்டடிகள் கொண்டது .

சமயங்களைக் கடந்த மதங்களைக் கடந்த பாடல்களைக் கொண்டது குணங்குடி மஸ்தான் பாடல்கள். தாயுமானவர் பாடல்கள் போல் பெரும் சிறப்புக்குறியன.

ஏறத்தாழ ஒத்தக் கருத்தினை கொண்டவை. சரவணப் பெருமாள் ஐயர், ஐயா சுவாமி முதலியார், வேங்கடராயப்பிள்ளைக் கவிராயர் சபாபதி முதலியார், மற்றும் செய்கு அப்துல் காதிர் நயினார் லெப்பை ஆலிம் புலவர் போன்றவர்களால் புகழ் மாலைப் பாடப்பெற்ற சிறப்பு திரு குணங்குடி மஸ்தான் பாடல்களுக்கு உண்டு.

முடிந்த வரை ஒரு பதிவிற்கு 5 பாடல்கள் வீதம் பதிக்க முயல்கிறேன். கற்றுணர்ந்த பெரியோர்களும், எல்லாம் வல்ல ஆண்டவனும் துணை புரிவானாக. தவறு கண்டவிடத்தில் சுட்டிக் காட்டி திருத்துமாறு வேண்டுகிறேன்.

பாடல் : 001

அண்ட புவனமென்றும் ஆடுதிருக் கூத்தினையான்
கண்டு மகிழ்ந்திடவே காட்டாய் பராபரமே.

*****
எங்கும் நிறைந்த பராபரப் பொருளே.. அண்டம், புவனங்களில் ஆடும் நின் திருக்கூத்தினை நாங்கள் மனம் மகிழ காட்டிடுவாய்... அந்த பேரின்பைதை தந்திடுவாய்.

பாடல் : 002

ஆதியாய் ஆண்டவனாய் அஃததுவாய் நின்றபெருஞ்
சோதியாய் நின்மலமாய் சூழ்ந்தாய் பராபரமே.

*****
ஆதியானவனே... ஆண்டவனானவனே.. அதததுவாய் நின்ற பெருஞ்சோதியே..
அப்பழுக்கற்ற நிர்மலமாய் எங்க்கும் சூழ்ந்திருக்கிறாய் நீ பராபரமே

பாடல் : 003

வேத மறைப்பொருளை வேதாந்தத் துஉட்கருவை
ஓதி உனையறிந்தார் உண்டோ பராபரமே
*****
வேதத்தின் மறைப்பொருளையும், வேதாந்த உட்கருத்தினையும் ஓதி உன்னையறிந்தவர்கள்
யாருள்ளார் பராபரமே

பாடல் : 004

அண்ட புவனமுடன் ஆகாசமென் றுசும்பிக்
கொண்டாடும் மெய்ஞ்ஞானக் கூத்தே பராபரமே

*****
அண்டங்களும் புவனங்களும் ஆகாசமென்றசைந்துக் கொண்டாடும்
மெய்ஞ்சானக் கூத்தான பராபரமே

பாடல் : 005

நாவாற் புகழ்க்கெட்டா நாயகனே நாதாந்தம்
பூவாய் மலர்ந்திருக்க பூத்தாய் பராபரமே

****

நாவினால் புகழவியலாத அதற்கு எட்டாத நாயகனே,
நாகந்த பூவாய் மலர்ந்திருக்க பூத்தாய் பராபரமே

****

அன்புடன்
ஜீவா

நாலு நாலுன்னு டாக் குறாங்களே...

2006-03-04T11:31:00.000+05:30

நாலென்று நித்தம் பதிவர் நாள்தோறும்
நாலதையே பதிக்க வெனக்கான- நாலும்
எதுவென்று நானறிய வல்லேனென் நாலும்
எதுவென்று சொல்லவல்லார் யார் ??

அன்புடன்
ஜீவா

நாளை இந்த வேளை பார்த்து ..... திரையிசையினூடே பயணம்.. 02

2006-03-03T09:09:00.000+05:30

பால் போலவே... வான் மீதிலே..
யார் காணவே நீ காய்கிறாய்..

பிரிவின் வேதனையில் இருக்கும் பெண்ணின் உணர்ச்சிகள் இந்தப் பாடலில் அப்படியே குரலிலும் வெளிப்பட்டிருக்கும்.

நாளை இந்த வேளை பார்த்து
ஓடிவா நிலா
இன்று எந்தன் தலைவன் இல்லை
சென்று வா நிலா
தென்றலே என் தனிமை கண்டு
நின்று போய்விடு...

வண்ண விழியின் வாசலில் என் தேவன் தோன்றினான்
எண்ணம் என்னும் மேடையில் பொன் மாலை சூடினான்
கன்னி அழகை பாடவோ அவன் கவிஞன் ஆகினான்
பெண்மையே உன் பெண்மை கண்டு அவன் கலைஞன் ஆகினான்

1968 ம் வருடம் வெளியிடப்பட்ட "உயர்ந்த மனிதன் " படத்தில் இந்தப் பாடலுக்காக தேசிய விருதும் மாநில விருதும் திருமதி. பி.சுசீலா அவர்களுக்கு வழங்கப் பட்டிருக்கிறது.

சொல்ல நினைத்த ஆசைகள் சொல்லாமல் போனதேன்
சொல்ல வந்த நேரத்தில் பொல்லாத நாணம் ஏன்
மன்னன் நடந்த பாதையில் என் கால்கள் செல்வதென்
மங்கையே உன் கண்கள் இன்று மயக்கம் கொண்டதேன்...
மயக்கம் கொண்டதேன்...

அம்மம்மா.. வெகுநாளாக இந்த பாடலை எழுதியது கண்ணதாசன் என்று நினைத்துக் கொண்டிருந்தேன். ஆனால் விஸ்வநாதன் ராமமூர்த்தி இசையில் எழுதியவர் வாலி. அதெல்லாம் சரி நான் சொல்வதிருக்கட்டும் நீங்களே கேட்டுப் பாருங்களேன்

நன்றி தூள்.காம் :

http://www.dhool.com/sotd/naalai.rm

அன்புடன்
ஜீவா

திரையிசையினூடே பயணம்.. என் இரசனையுடன்.

2006-03-01T22:35:00.000+05:30

திரையிசை பாதிக்கப்படாத மக்கள் பெரும்பாலும் இன்று யாரும் இருக்க முடியாது. நான் இசையை இரசிக்க துவங்கியதும் திரையிசையினால் தான். அப்போதெல்லாம் வானொலியில் விவித பாரதி, திருச்சி, இலங்கை வானொலி என எப்போதும் பாடல்கள் அதுவும் அருமையான பாடல்கள் நம்மைத் தழுவிச்செல்லும்.

இந்தப் பாட்டை கேட்டிருப்பீங்க தானே ??

சரவணப்பொய்கையில் நீராடி..
துணை தந்தருள் என்றேன் முருகனிடம்
இருகரம் நீட்டி வரம் கேட்டேன் அந்த
மன்னவன் இன்னருள் மலர் தந்தான்

பி.சுசீலா குரலில தேனைத்தடவி தந்த மாதிரி எத்தனை அருமையான பாடல்.

கண்ணதாசன் எழுதி விஸ்வநாதன் இராமமூர்த்தி இசையில்..

கண்ணதாசனோட வார்த்தை விளையாட்டும் அருமையா இருக்குங்க...

அவனிடம் சொன்னேன் என் அஞ்சுதலை அந்த
அண்ணலே தந்து வைத்தான் ஆறுதலை
இவ்விடம் இவர் கண்ட இன்ப நிலை கண்டு
என்னிடம் நான் கண்டேன் மாறுதலை...

மோனைம்பாங்காளே அப்படி விளையாடும்...

நல்லவர் என்றும் நல்லவரே உள்ளம்
உள்ளவர் யாவரும் உள்ளவரே
நல்ல இடம் நான் தேடி வந்தேன் அந்த
நாயகன் என்னுடன் கூட வந்தான்..

கடைசி வரில என்ன ஒரு சிலேடை பாத்தீங்களா..

படம் : இது சத்தியம்
பாடியவர் : பி.சுசீலா
பாடல் : கண்ணதாசன்
இசை : விச்சு, ராமு ( அதாங்க விஸ்வநாதன்,ராமமூர்த்தி)

என்ன ? மொத்தப் பாடலையும் கேக்கனும்போல இருக்கா..

கீழ இருக்கிற சுட்டில படத்தோடமொத்தப் பாடலும் கிடைக்கும் பாருங்க..

http://www.musicindiaonline.com/l/26/s/movie_name.4510/

அன்புடன்
"ஜீவா'

நானும் தமிழ்மணமும்...

2006-02-27T09:40:00.000+05:30

தன்முயற்சியில் சற்றும் தளராத விக்கிரமாதித்தனாய் நானும் முயற்சிட்டு இருக்கேன்.. தமிழ்மணத்துல என்னோட பதிவுகள் தெரியமாட்டேங்குதே... என்ன செய்யறதுன்னு யாரச்சும் சொல்லுங்க :(

அன்புடன்
ஜீவா

நந்திக் கலம்பகம்..

2006-02-27T02:12:00.000+05:30

கதம்ப மாலை பார்த்திருக்கிறீர்களா... பல விதமான பூக்களைக் கொண்டு தொடுக்கப் படும் மாலை. அதுபோல பலவிதமான பொருளையுடைய பாக்கள் கொண்டமைக்கப் பட்டது கலம்பகம். அப்படிப் பாடப்பட்டது தான் " நந்திக் கலம்பகம்".

தமிழின் அழகை எல்லா விதத்திலும் அனுபவித்த நந்திவர்மன், அறம்பாடுதலை மட்டும் கேட்கவில்லை. அதுவும் தன்மேல் அறம்பாடி கேட்கவேண்டும் என்ற விபரீத ஆசையும் வந்தது அவனுக்கு. அதற்காக நூறுபாடல்களை ஒரு புலவரைக் கொண்டு பாடச்செய்ய ஏவினான். புலவர் மறுத்தார். இதைப் பாடினால் மன்னன் இறந்துவிடுவான் என்று அஞ்சினார். ஆயினும் நந்திவர்மனுக்கு ஆசையும் விடவில்லை அதேநேரம் விதியும் விடவில்லை. தான் இறந்த பிறகாவது இந்தப் பாடலை பாடவேண்டுமமெ என்ற வேண்டுகோள் விடுத்துவிட்டு புலவர் அறியாமல் தான் இறந்தது போல படுத்துக் கொண்டான்.

மன்னனின் கடைசி ஆசை அல்லவா... மன்னனும் இறந்துவிட்டானே என்று புலவரும் அறம் பாட உண்மையில் மன்னன் இறந்தே போனான். அப்படி எழுந்தது தான் நந்திக் கலம்பகம்.

ஒருசாரார் நந்திவர்மனின் தம்பி நாட்டைக் கவர வேண்டி தன் அண்ணனின் தமி ஆர்வத்தை பயன்படுத்தி அறம் பாடுதலை கேட்க ஏற்பாடு செய்ததாகவும் அதற்காக அரண்மனையில் இருந்து மயானம் வரை நூறு பந்தர்கள் அமைத்து நூறாவது பந்தரின் மேல் அண்ணனை இருத்தி புலவர்களைக் கொண்டு அறம் பாடசெய்தான் என்றும் ஒவ்வொரு பாடலின் போதும் ஒரு பந்தர் எரிந்து போய் கடைசிப் பாடலில் நந்திவர்மனும் தீயிடைப் பட்டு இறந்துபோனான் என்று கூறுகிறார்கள்.

உண்மை எது ??.. படித்தவர்கள் விளக்குவீர்களா ??

அன்புடன்

ஜீவா....

காட்சிக் கவிதை - - 1

2006-02-27T01:33:00.000+05:30

இந்த பறவை என்னதான்
சொல்ல வருதுன்னு யாராச்சும் சொல்லுங்க

மைசூரில் இருக்கும் பறவைகள் சரணாலயத்தில் எடுத்த புகைப்படம்.

மற்ற புகைப்படங்களும் விரைவில்

அன்புடன்
oO(ஜீவா)Oo

அந்தநாள் ஞாபகம்...

2006-02-27T01:26:00.000+05:30

சின்ன வயசுல இதெல்லாம் சொல்லிட்டு இருப்போம்.. இப்ப கொழந்தைகளுக்கு யார் சொல்லி தராங்க...

***
எந்த ஊர் ?
மைலாப்பூர்
என்ன மயில் ?
காட்டு மயில்
என்ன காடு ?
ஆற்காடு
என்ன ஆறு ?
பாலாறு
என்ன பால் ?
கள்ளிப் பால்
என்ன கள்ளி?
இலைக் கள்ளி
என்ன இலை?
மாவிலை
என்ன மா?
அம்மா

/.... அதெல்லாம் ஒரு காலமுங்க../

அன்புடன்
oO( ஜீவா )Oo

கைவிளக்கு

2006-02-27T01:19:00.000+05:30

அது ஒரு சிறிய கிராமம். அந்த கிராமத்தை சேர்ந்த மனிதன் ஒருவனின் மனைவிக்கு உடல் நிலை சரியில்லை. அவள் உடல் நிலைசரியாக வேண்டும் என்றால் மலையின் உச்சியில் இருக்கும் ஒரு மூலிகையால் மட்டுமே முடியும். ஆனால் அந்த இடம் காடுகளால் அடர்ந்து முழுதும் இருட்டாகவே இருந்தது.

இந்த மனிதனுக்கோ இருட்டென்றால் பயம். அவன் வீட்டுப் பக்கமாக ஒரு சாது வந்தார். அவரிடம் இந்த மனிதன் போய் உதவி கேட்டான்.சாதுவோ அந்த மலையில் இருக்கும் மூலிகையை கொண்டுவரச் சொன்னார்.

” ரொம்பவும் இருட்டான காடு ஐயா”“உன்னிடம் தான் விளக்கு இருக்கிறதே”” இந்த விளக்கின் வெளிச்சம் பத்தடிக்கு மேல் தெரியாதே”
சாது நகைத்துக் கொண்டே சொன்னார்…

” இந்த விளக்கை வைத்துக் கொண்டு பத்தடி முன்னேறு.. உன்னுடனே இந்த வெளிச்சம் வரும் ”

****

நம்மில் பெரும்பாலோர் இப்படி தான்… கையில் விளக்கிருந்தும் இருட்டு கண்டஞ்சுகிறோம்.

– ஜப்பானிய மூலக்கதையில் இருந்து எடுக்கப் பட்டது.

அன்புடன்
“ஜீவா”

கடவுள் வாழ்த்து

2006-02-27T01:10:00.000+05:30

வருவினை நீக்கிநம் வந்தவினைப் போக்கி
கருவினில் தாயெனக் காத்து - செருக்கு
வருமுன்னே போக்கிநல் வாழ்வருள் தெய்வம்
திருவருணை வாழும் கரி

வோர்ட் பிரஸில் இருந்து பிளாக்ஸ்பாட்டுக்கு

2006-02-25T20:59:00.000+05:30

சோதனையோட்டமா இங்க இடறேன்.. எனக்கு வோர்ட் ப்ரஸ்ல ஆரம்பிச்ச பிளாக்குல தமிழ்மணத்துல இருக்கிற வசதிகளை உபயோகிக்க முடியல... அதனால தான் இந்த பதிவு.. அங்க இருக்கிற எல்லாமும் இங்க மாத்தி மறுபடி ஆரம்பிக்க போறேன்... தப்பா எடுத்துக்காதிங்க மக்களே

நன்றி

ஜீவா